امریکی صدر ڈونلڈ ٹرمپ نے ایران سے متعلق ایک اہم بیان میں کہا ہے کہ اس معاملے پر ’اچھی خبر‘ سامنے آ رہی ہے اور ممکن ہے کہ کل کوئی غیر متوقع پیشرفت یا اعلان سامنے آئے۔
غیر ملکی خبر رساں اداروں کے مطابق ڈونلڈ ٹرمپ نے صحافیوں سے گفتگو کرتے ہوئے کہا کہ ایران سے متعلق معاملات میں پیش رفت جاری ہے اور اچھی خبر سامنے آ رہی ہے، جس کے نتیجے میں کل کسی ’سرپرائز‘ کا امکان موجود ہے۔
یہ بھی پڑھیں:صدر ڈونلڈ ٹرمپ کا متوقع دورہ پاکستان، اب تک کن کن امریکی صدور نے پاکستان کے دورے کیے؟
انہوں نے کہا کہ اگر کسی معاہدے تک نہ پہنچا جا سکا تو امریکا کی جانب سے ایرانی بندرگاہوں پر عائد پابندیاں برقرار رہیں گی۔ ان کے مطابق کل کچھ ہونے والا ہے اور ممکنہ طور پر یہ ایک مثبت پیشرفت ہوگی۔
ڈونلڈ ٹرمپ نے مزید کہا کہ کل ایک اہم اور بااثر شخصیت وائٹ ہاؤس کا دورہ کرے گی، جس کے ساتھ ملاقات کو غیر معمولی نوعیت کا قرار دیا جا رہا ہے۔ ان کے مطابق اس حوالے سے ایک خصوصی پریس کانفرنس بھی منعقد کی جائے گی۔
رپورٹس کے مطابق اس وقت ایران کی جانب سے آبنائے ہرمز کو تجارتی جہازوں کے لیے کھولنے کا اعلان کیا گیا ہے، تاہم ایرانی حکام نے واضح کیا ہے کہ یہ اقدام جنگ بندی اور معاہدے کی پابندی سے مشروط ہوگا، اور خلاف ورزی کی صورت میں دوبارہ بندش کا امکان موجود ہے۔
بین الاقوامی تجزیہ کاروں کے مطابق امریکی صدر کا یہ بیان ایران سے متعلق جاری سفارتی و اقتصادی صورتحال میں ایک اہم اشارہ سمجھا جا رہا ہے، جس پر عالمی سطح پر گہری نظر رکھی جا رہی ہے۔
