عوامی مسلم لیگ کے سربراہ اور پاکستان تحریک انصاف کے حلیف شیخ رشید کی گرفتاری پر توہین عدالت کی درخواست پر اسلام آباد ہائی کورٹ نے پولیس سمیت تمام فریقین کو نوٹس جاری کر دیے۔
جسٹس طارق محمود جہانگیری نے شیخ رشید کی گرفتاری پر توہین عدالت کی درخواست پر سماعت کی۔ فاضل جج نے ریمارکس دیے کہ عدالت نے ایف آئی آر کے اندراج سے نہیں روکا تھا بلکہ نوٹس معطل کیا تھا اس کے کوئی خلاف ورزی ہوئی ہو تو بتایا جائے۔
فاضل جج نے استفسار کیا کہ کس آرڈر کی خلاف ورزی ہوئی ہے، آپ نے صرف نوٹس کو چیلنج کیا تھا ایف آئی آر کو نہیں۔
درخواست گزار کے وکیل کی جانب سے مؤقف اختیار کیا گیا کہ عدالتی حکم نامہ سے تاثر ملا تھا کہ معاملہ کورٹ میں ہے تو ادارے تحمل کا مظاہرہ کریں گے۔ اس پرجسٹس طارق محمود جہانگیری جسٹس نے ریمارکس دیے کہ کاش اتنا احترام ہوتا، یہاں تو ایک کیس میں ضمانت ہو تو باہر دوسرے مقدمہ میں اٹھا لیا جاتا ہے۔ انہوں نے یہ ریمارک بھی دیا کہ اگر سب کچھ ٹھیک ہوتا تو کیا نوبت یہاں تک پہنچتی۔
