اسلام آباد کے علاقے بلیو ایریا میں خطرناک ڈرفٹنگ کے ذریعے شہریوں کی جان خطرے میں ڈالنے والے ملزمان کے خلاف اسلام آباد ٹریفک پولیس اور تھانہ کوہسار نے بڑی کارروائی کی ہے۔
مشترکہ کارروائی کے دوران خطرناک ڈرفٹنگ میں ملوث ملزمان کو گرفتار کر لیا گیا ہے جبکہ ان کی گاڑیاں بھی قبضے میں لے کر تھانے میں بند کر دی گئی ہیں۔
یہ بھی پڑھیں: اسلام آباد پولیس کا شہریوں سے زیادہ کرایہ وصول کرنے والے ٹرانسپورٹرز کے خلاف کریک ڈاؤن
ترجمان اسلام آباد پولیس کے مطابق گرفتار ملزمان کے خلاف تھانہ کوہسار میں مقدمہ درج کرلیا گیا ہے۔
اسلام آباد ٹریفک پولیس اور تھانہ کوہسار کی مشترکہ کارروائی۔
بلیو ایریا میں ڈرفٹنگ کرنے اور شہریوں کی جان خطرے میں ڈالنے والے ملزمان گرفتار۔ڈرفٹنگ کے لئے استعمال ہونے والی گاڑیاں بھی تھانے میں بند کر دی گئیں۔
ملزمان کے خلاف تھانہ کوہسار میں مقدمہ درج ہے۔
ٹریفک کی بلا تعطل روانی… pic.twitter.com/YmxqlcNyZA— Islamabad Police (@ICT_Police) April 18, 2026
اس موقع پر چیف ٹریفک آفیسر محمد سرفراز ورک نے واضح کیا کہ شہر کی سڑکوں پر ٹریفک کی روانی کو ہر صورت یقینی بنایا جائے گا اور ٹریفک کے بہاؤ میں خلل ڈالنے والے کسی بھی شخص کے ساتھ کوئی رعایت نہیں برتی جائے گی۔
یہ بھی پڑھیں: اسلام آباد پولیس کی کارروائیاں، جرائم پیشہ عناصر اور غیر قانونی مقیم افراد کے گرد گھیرا تنگ
انہوں نے مزید کہا کہ شہریوں کی حفاظت اور رہنمائی کے لیے ٹریفک پولیس کے جوان ہر وقت سڑکوں پر موجود ہیں۔
سی ٹی او نے خبردار کیا کہ قانون ہاتھ میں لینے والوں اور شہریوں کی زندگیوں سے کھیلنے والوں کے خلاف بھرپور قانونی کارروائی جاری رہے گی تاکہ سڑکوں پر نظم و ضبط برقرار رکھا جاسکے۔
