ڈپٹی کمشنر راولپنڈی کی جانب سے جاری کردہ اہم اعلامیے کے مطابق شہر میں ہر قسم کی پرائیویٹ، پبلک اور گڈز ٹرانسپورٹ کو فوری طور پر معطل کر دیا گیا ہے۔ اعلامیے میں کہا گیا ہے کہ یہ پابندی تاحکمِ ثانی نافذ العمل رہے گی اور شہریوں کو کسی بھی نئی پیش رفت سے بروقت آگاہ کیا جائے گا۔
یہ بھی پڑھیں:راولپنڈی اور اسلام آباد میں ٹرانسپورٹ اڈے آج رات سے بند، احکامات جاری
ضلعی انتظامیہ کے مطابق یہ اقدام موجودہ سیکیورٹی صورتحال کے پیش نظر کیا گیا ہے تاکہ شہر میں امن و امان کو برقرار رکھا جا سکے۔ حکام نے شہریوں سے اپیل کی ہے کہ وہ غیر ضروری سفر سے گریز کریں اور انتظامیہ کے ساتھ مکمل تعاون کریں۔
وفاقی دارالحکومت اسلام آباد میں بھی ضلعی انتظامیہ نے اہم فیصلہ کرتے ہوئے پبلک اور ہیوی ٹرانسپورٹ کو معطل کرنے کا اعلان کیا ہے۔ جاری بیان میں کہا گیا ہے کہ اسلام آباد میں بھی ہیوی ٹرانسپورٹ اور پبلک ٹرانسپورٹ تاحکمِ ثانی بند رہے گی۔
انتظامیہ نے شہریوں پر زور دیا ہے کہ وہ سیکیورٹی اداروں کے ساتھ تعاون کریں اور جاری کردہ ہدایات پر عمل درآمد یقینی بنائیں۔ حکام کا کہنا ہے کہ ان اقدامات کا مقصد شہریوں کی حفاظت کو یقینی بنانا اور کسی بھی ممکنہ ناخوشگوار واقعے سے بچاؤ ہے۔
یہ بھی پڑھیں:اسلام آباد میں ٹرانسپورٹ اڈے بند ہونے کی افواہیں، ضلعی انتظامیہ کی تردید
شہریوں کو ہدایت کی گئی ہے کہ وہ کسی بھی افواہ پر کان نہ دھریں اور صرف مستند ذرائع سے معلومات حاصل کریں۔ ضلعی انتظامیہ نے یقین دہانی کرائی ہے کہ صورتحال پر مسلسل نظر رکھی جا رہی ہے اور حالات کے مطابق فیصلے کیے جائیں گے۔
