امریکی صدر ڈونلڈ ٹرمپ نے کہا ہے کہ وہ ایران کے معاملے پر سابق صدر بارک اوباما کے دور کی غلطی کو دہرانے کا ارادہ نہیں رکھتے۔
فوکس نیوز کو دیے گئے انٹرویو میں ڈونلڈ ٹرمپ نے تہران کو خبردار کرتے ہوئے کہاکہ یہ امن معاہدے کے لیے آخری موقع ہے اور ایران کو اب فیصلہ کرنا ہوگا۔
ان کے بقول اگر ایران نے اس پیشکش کو قبول نہ کیا تو اسے سنگین نتائج کا سامنا کرنا پڑے گا۔
انہوں نے واضح کیاکہ وہ 2015 میں اوباما انتظامیہ کی جانب سے کیے گئے ایران کے ساتھ جوہری معاہدے جیسی حکمت عملی اختیار نہیں کریں گے۔
ڈونلڈ ٹرمپ کا کہنا تھا کہ اب مزید نرمی کی گنجائش نہیں رہی اور ایران کو جلد فیصلہ کرنا ہوگا۔
امریکی صدر نے مزید کہاکہ اگر ایران معاہدے پر آمادہ نہ ہوا تو وہ ضروری اقدامات کرنے سے گریز نہیں کریں گے، اور ان کے مطابق یہ وہ اقدامات ہیں جو گزشتہ کئی دہائیوں میں کیے جانے چاہیے تھے۔
انہوں نے زور دیا کہ اب وقت آ چکا ہے کہ ایران کی جنگی مشینری کا خاتمہ کیا جائے۔
واضح رہے کہ امریکا اور ایران کے درمیان مذاکرات کا دوسرا آئندہ ہفتے اسلام آباد میں ہونے جا رہا ہے، اور صدر ٹرمپ نے اعلان کیا ہے کہ ان کے نمائندے اسلام آباد روانہ ہو رہے ہیں۔
