امریکی ریاست لوزیانا کے شہر شریوپورٹ میں فائرنگ کے ایک ہولناک واقعے نے پورے ملک کو ہلا کر رکھ دیا ہے، جہاں ایک مسلح شخص نے اندھا دھند فائرنگ کر کے ایک شیر خوار سمیت 8 بچوں کو موت کے گھاٹ اتار دیا۔
یہ بھی پڑھیں: امریکا کے شہر منیپولس میں کیتھولک اسکول میں فائرنگ،3 بچے جان سے گئے، متعدد زخمی
پولیس حکام کے مطابق حملہ آور نے ایک ہی علاقے کے 3 مختلف گھروں کو نشانہ بنایا۔ فائرنگ کے نتیجے میں مجموعی طور پر 10 افراد متاثر ہوئے، جن میں سے 8 بچے زخموں کی تاب نہ لاتے ہوئے دم توڑ گئے، ہلاک ہونے والے بچوں کی عمریں ایک سے 14 سال کے درمیان بتائی جارہی ہیں۔
پولیس کے مطابق ابتدائی تحقیقات سے معلوم ہوا ہے کہ مقتولین میں سے اکثر کا تعلق حملہ آور کے اپنے خاندان سے تھا اور وہ اس کی اپنی اولاد بتائے جاتے ہیں۔
یہ بھی پڑھیں: امریکا میں عوامی مقامات پر فائرنگ کے واقعات اور ہلاکتوں میں مسلسل اضافہ
واردات کے بعد ملزم نے گاڑی چھین کر فرار ہونے کی کوشش کی، تاہم پولیس نے تعاقب کے بعد فائرنگ کے تبادلے میں اسے ہلاک کر دیا۔
شریوپورٹ کے پولیس چیف وین اسمتھ نے اس سانحے کو شہر کی تاریخ کا انتہائی افسوسناک واقعہ قرار دیتے ہوئے کہا ہے کہ جائے وقوعہ سے شواہد اکٹھے کر لیے گئے ہیں اور حملے کے اصل محرکات جاننے کے لیے تفتیش کا دائرہ وسیع کر دیا گیا ہے۔
