چین کے سفیر جیانگ زائی ڈونگ نے آج نائب وزیر اعظم اور وزیر خارجہ سینیٹر اسحاق ڈار سے ملاقات کی۔
ملاقات میں خطے کی تازہ صورتحال پر تبادلہ خیال کیا گیا۔ چینی سفیر نے پاکستان کی جانب سے امریکہ اور ایران کے درمیان رابطوں میں سہولت کاری کی مسلسل کوششوں کو سراہتے ہوئے خطے اور اس سے باہر پائیدار امن و استحکام کے لیے چین کی مکمل حمایت کا اظہار کیا۔
یہ بھی پڑھیے: وزیرخارجہ اسحاق ڈار کا مصری ہم منصب سے ٹیلی فونک رابطہ، امن و استحکام کے لیے مکالمے پر زور
نائب وزیر اعظم اور وزیر خارجہ نے پاکستان اور چین کے درمیان ہر موسم کی اسٹریٹیجک تعاون پر مبنی شراکت داری کے عزم کا اعادہ کیا، دوطرفہ تعلقات کی مضبوطی کو اجاگر کیا، اور دونوں ممالک کے درمیان اعلیٰ سطحی روابط کے تسلسل کی اہمیت پر زور دیا۔
اس سے قبل وزیر خارجہ اسحاق ڈار نے مصری ہم منصب سے ٹیلی فون پر رابطہ کیا جس میں خطے کی صورتحال پر تبادلہ خیال کیا گیا۔
وزارتِ خارجہ کے ترجمان کے مطابق نائب وزیراعظم و وزیر خارجہ اسحاق ڈار نے آج مصری وزیر خارجہ بدر عبدالعاطی سے ٹیلیفون پر گفتگو کی جس میں خطے کی تازہ ترین صورتحال پر تبادلہ خیال کیا گیا۔
یہ بھی پڑھیے: اسحاق ڈار کی آسٹریلوی ہم منصب سے گفتگو، اسلام آباد مذاکرات پر تبادلہ خیال
دونوں رہنماؤں نے امن و استحکام کے فروغ کے لیے مکالمے اور روابط کی اہمیت پر زور دیا اور اس بات پر اتفاق کیا کہ وہ قریبی رابطے میں رہیں گے۔
