نائب وزیراعظم اور وزیر خارجہ سینیٹر محمد اسحاق ڈار نے کہا ہے کہ پاکستان اقوام متحدہ کے چارٹر کے اصولوں، خصوصاً خودمختار برابری، تنازعات کے پرامن حل اور بین الاقوامی امن و سلامتی کے لیے اجتماعی اقدامات کے عزم کی بھرپور توثیق کرتا ہے۔
اقوام متحدہ کے تحت منائے جانے والے ‘کثیر الجہتی نظام اور امن کے لیے سفارتکاری کے عالمی دن’ کے موقع پر اپنے پیغام میں انہوں نے کہا کہ موجودہ دور میں جب دنیا بھر میں تنازعات میں اضافہ ہو رہا ہے اور بین الاقوامی اداروں پر اعتماد کمزور ہو رہا ہے۔
یہ بھی پڑھیں: اسحاق ڈار کا روسی ہم منصب سے رابطہ، دوطرفہ تعلقات اور عالمی امن پر گفتگو
اسحاق ڈار نے کہا کہ ایسے میں کثیر الجہتی نظام اور سفارتکاری ہی امن کے حصول کا واحد قابلِ اعتماد اور پائیدار راستہ ہیں۔
اسحاق ڈار نے کہا کہ آج کے عالمی چیلنجز اس بات کے متقاضی ہیں کہ بات چیت، تعاون اور بین الاقوامی قانون کے احترام کے لیے نئے عزم کے ساتھ آگے بڑھا جائے۔
🔊PR No.1️⃣0️⃣7️⃣/2️⃣0️⃣2️⃣6️⃣
Message by the Deputy Prime Minister/Foreign Minister Senator Mohammad Ishaq Dar on the International Day of Multilateralism and Diplomacy for Peace
🔗⬇️ pic.twitter.com/RgiRg6pk7o
— Ministry of Foreign Affairs – Pakistan (@ForeignOfficePk) April 24, 2026
ان کے مطابق پاکستان ہمیشہ سے تنازعات کے پرامن حل، مذاکرات، ثالثی اور سفارتی ذرائع کے استعمال کا حامی رہا ہے۔
انہوں نے کہا کہ پاکستان نے حالیہ مہینوں میں علاقائی اور بین الاقوامی شراکت داروں کے ساتھ مل کر کشیدگی میں کمی، اختلافات کے خاتمے اور جاری تنازعات کے حل کے لیے سفارتی کوششوں کو فروغ دیا ہے۔
مزید پڑھیں: علاقائی و عالمی صورتحال: اسحاق ڈار کی دفترِ خارجہ حکام کو متحرک سفارت کاری کی ہدایت
وزیر خارجہ نے مزید کہا کہ اقوام متحدہ کے امن مشنز میں پاکستان کی طویل اور نمایاں خدمات موجود ہیں، اور ملک ہمیشہ کثیر الجہتی سفارتکاری کے فروغ، تعاون کے استحکام اور عالمی نظام کی مضبوطی کے لیے تعمیری کردار ادا کرتا رہے گا۔
انہوں نے عالمی برادری پر زور دیا کہ وہ کثیر الجہتی نظام کو دوبارہ فعال بنائے اور سفارتی روابط کو مضبوط کرے تاکہ ایک پرامن، منصفانہ اور خوشحال دنیا تشکیل دی جا سکے۔
