ترکیہ نے اعلان کیا ہے کہ اگر ایران اور امریکہ کے درمیان امن معاہدہ طے پا جاتا ہے، تو وہ آبنائے ہرمز کو بحری بارودی سرنگوں سے پاک کرنے کی بین الاقوامی کوششوں میں شامل ہونے پر غور کرسکتا ہے۔
ترک وزیرِ خارجہ ہاکان فیدان نے لندن میں صحافیوں سے گفتگو کرتے ہوئے کہا کہ اس اسٹریٹجک آبی گزرگاہ میں محفوظ جہاز رانی کی بحالی کے لیے ایک کثیر القومی تکنیکی ٹیم کی تشکیل ترکیہ کی شمولیت کی کلید ہوگی۔
یہ بھی پڑھیں: آبنائے ہرمز کی بندش سے امریکی ڈالر پر کیا اثرات مرتب ہو رہے ہیں؟
ہاکان فیدان نے واضح کیا کہ بارودی سرنگیں ہٹانے کا آپریشن تہران اور واشنگٹن کے درمیان باضابطہ معاہدے کے بعد ہی ممکن ہوسکے گا، جس میں مختلف ممالک کے ماہرین شامل ہوں گے۔
انہوں نے اس ممکنہ شرکت کو عالمی تجارت اور سمندری تحفظ کے حوالے سے ایک انسانی ذمہ داری قرار دیا۔ تاہم انہوں نے خبردار کیا کہ اگر یہ کثیر القومی کوشش کسی نئے فوجی تنازع کی شکل اختیار کرتی ہے، تو انقرہ اپنے کردار پر نظرثانی کرے گا۔
یہ بھی پڑھیں: آبنائے ہرمز کھولنے پر امریکی صدر ڈونلڈ ٹرمپ ایران کے شکرگزار
آبنائے ہرمز عالمی توانائی کی منڈیوں کے لیے ریڑھ کی ہڈی کی حیثیت رکھتی ہے کیونکہ دنیا کی تیل اور قدرتی گیس کی ترسیل کا بڑا حصہ اسی تنگ راستے سے گزرتا ہے۔
ترک وزیرِ خارجہ نے ایران اور امریکہ کے درمیان جاری سفارتی کوششوں پر محتاط امید کا اظہار کیا اور کہا کہ پاکستان میں ہونے والے مذاکرات کے اگلے دور میں ایران کے جوہری پروگرام سے متعلق تنازعات حل ہونے کی توقع ہے۔
