چیف جسٹس آف پاکستان جسٹس یحییٰ آفریدی کی زیر صدارت جوڈیشل کمیشن کا اجلاس ہوا ہے، جس میں اہم فیصلے کرلیے گئے۔
مزید پڑھیں: ججز ٹرانسفر معاملہ: جسٹس بابر ستار کی کمیشن اجلاس سے قبل ذاتی سماعت کی درخواست
ذرائع کے مطابق اجلاس میں لاہور ہائیکورٹ میں ججز کے تبادلوں سے متعلق امور پر غور کیا گیا، جس کے دوران جسٹس محسن اختر کیانی کے لاہور ہائیکورٹ تبادلے کی منظوری دے دی گئی۔
یہ فیصلہ اکثریتی رائے سے کیا گیا، اور 9 ارکان نے ان کے تبادلے کے حق میں ووٹ دیا۔
ذرائع کے مطابق چیف جسٹس اسلام آباد ہائیکورٹ سرفراز ڈوگر نے جسٹس ارباب محمد طاہر اور جسٹس خادم سومرو کے تبادلے کی سفارش واپس لے لی۔
ذرائع کے مطابق جوڈیشل کمیشن نے جسٹس ثمن رفعت امتیاز کے سندھ ہائیکورٹ تبادلے کی بھی منظوری دے دی، جس کا فیصلہ بھی اکثریتی رائے سے کیا گیا۔
ذرائع کے مطابق اسلام آباد ہائیکورٹ کے جج جسٹس بابر ستار کا پشاور ہائیکورٹ میں تبادلہ کردیا گیا ہے، ان کے تبادلے کے خلاف 3 ووٹ سامنے آئے۔
اس سے قبل اسلام آباد ہائیکورٹ کے جج جسٹس بابر ستار نے چیف جسٹس یحییٰ آفریدی کو ایک خط تحریر کیا تھا۔
ذرائع کے مطابق جسٹس بابر ستار نے اپنے خط میں مؤقف اختیار کیاکہ آئین کے آرٹیکل 200 کے تحت کسی بھی جج کے تبادلے سے قبل انہیں ذاتی طور پر سنا جائے۔
مزید پڑھیں: سپریم کورٹ ججز تبادلہ کیس: جسٹس نعیم اختر افغان کا 40 صفحات پر مشتمل اختلافی نوٹ جاری
انہوں نے کمیشن سے استدعا کی کہ ٹرانسفر کے معاملے پر فیصلہ کرنے سے پہلے انہیں مؤقف پیش کرنے کا موقع دیا جائے۔
