پاکستان ٹیسٹ ٹیم کے ہیڈ کوچ سرفراز احمد نے اپنی تقرری پر ہونے والی تنقید کا جواب دیتے ہوئے کہا ہے کہ وہ نئی ذمہ داری کے حوالے سے پُراعتماد ہیں اور ٹیم کو کامیابی کی راہ پر گامزن کرنے کے لیے پُرعزم ہیں۔ بنگلہ دیش کے خلاف سیریز سے قبل قومی ٹیم کی تیاریاں جاری ہیں۔
پاکستان ٹیسٹ ٹیم کے ہیڈ کوچ سرفراز احمد نے قومی ٹیم کی کوچنگ سنبھالنے پر ہونے والی تنقید کا جواب دیتے ہوئے کہا ہے کہ وہ اپنی نئی ذمہ داری کو ایک اہم موقع سمجھتے ہیں اور اس سے بھرپور فائدہ اٹھانے کے لیے پُرعزم ہیں۔
بنگلہ دیش کے خلاف سیریز سے قبل جاری تربیتی کیمپ کے موقع پر میڈیا سے گفتگو کرتے ہوئے سرفراز احمد نے کہا کہ بیرونی تنقید انہیں زیادہ متاثر نہیں کرتی۔ ان کا کہنا تھا، ’سابق کرکٹرز اور میرے ساتھیوں کی اپنی آراء ہیں، لیکن میں اس نئے موقع کے حوالے سے بہت پُرامید ہوں۔‘
View this post on Instagram
انہوں نے مزید کہا کہ ٹیم مینجمنٹ، جس میں عمر گل، اسد شفیق، گرانٹ لُوڈن اور عبدالسعد شامل ہیں، کے ساتھ مل کر وہ ٹیم کو کامیابی سے ہمکنار کرنے کے لیے پُراعتماد ہیں۔
پاکستان ٹیسٹ ٹیم اس وقت حنیف محمد ہائی پرفارمنس سینٹر میں بنگلہ دیش کے خلاف 2 ٹیسٹ میچوں کی سیریز کی تیاری کر رہی ہے، جو آئی سی سی ورلڈ ٹیسٹ چیمپئن شپ 2025-27 کا حصہ ہے۔
سیریز کا پہلا ٹیسٹ 8 سے 12 مئی تک ڈھاکا کے شیرِ بنگلہ نیشنل کرکٹ اسٹیڈیم میں کھیلا جائے گا، جبکہ دوسرا ٹیسٹ 16 سے 20 مئی تک سلہٹ انٹرنیشنل کرکٹ اسٹیڈیم میں ہوگا۔
بابر اعظم کی ٹی 20 میں واپسی سے متعلق سوال پر سرفراز احمد نے کہا کہ بابر اعظم نے شاندار کم بیک کیا ہے اور ان کی تکنیک ہمیشہ ان کی سب سے بڑی طاقت رہی ہے۔ انہوں نے کہا، ’یہ خوش آئند ہے کہ بابر اعظم رنز بنا رہے ہیں اور وہ بھی بہتر تکنیک کے ساتھ۔ جب وہ ٹیم میں شامل ہوں گے تو ہم ان کے کردار کا تعین کریں گے۔‘
بابر اعظم، جنہوں نے گزشتہ رات کراچی میں پاکستان سپر لیگ (پی ایس ایل) 11 کے فائنل تک پشاور زلمی کی قیادت کی، 3 مئی کے بعد ٹیم کو جوائن کریں گے۔ خرم شہزاد اور ٹیسٹ کپتان شان مسعود بھی پی ایس ایل سے فراغت کے بعد ٹیم میں شامل ہوں گے۔
فی الحال پاکستان آئی سی سی ورلڈ ٹیسٹ چیمپئن شپ کی درجہ بندی میں 12 پوائنٹس کے ساتھ پانچویں نمبر پر ہے۔ ٹیم نے اس سائیکل میں اب تک صرف 2 میچ جنوبی افریقہ کے خلاف اکتوبر 2025 میں کھیلے ہیں۔
رواں سال کے آخر میں پاکستان کو انگلینڈ، سری لنکا اور ویسٹ انڈیز کے خلاف بھی ٹیسٹ سیریز کھیلنا ہیں۔
بنگلہ دیش کے خلاف ٹیسٹ سیریز کے لیے پاکستان اسکواڈ
شان مسعود (کپتان)، عبداللہ فضل، عماد بٹ، اذان اویس، بابر اعظم، حسن علی، امام الحق، خرم شہزاد، محمد عباس، محمد رضوان (وکٹ کیپر)، محمد غازی غوری (وکٹ کیپر)، نعمان علی، ساجد خان، سلمان علی آغا، سعود شکیل اور شاہین شاہ آفریدی۔
