وفاقی دارالحکومت میں شادی ہالز اور مارکیز میں ون ڈش پالیسی پر سختی سے عمل درآمد یقینی بنانے کے لیے ضلعی انتظامیہ نے کارروائیوں کا سلسلہ تیز کر دیا ہے۔
یہ بھی پڑھیں: بازاروں کے اوقات کار میں کمی پر غور، شادی ہال اور ریستوران بھی جلد بند کروانے کا فیصلہ
حکام کے مطابق ون ڈش پالیسی کی خلاف ورزی پر متعدد شادی ہالز اور مارکیز کو سیل کر دیا گیا ہے جبکہ خلاف ورزی کرنے والوں پر بھاری جرمانے بھی عائد کیے گئے ہیں۔
انتظامیہ نے بتایا کہ دوسری بار خلاف ورزی پر شادی ہالز کے منیجرز اور مالکان کے خلاف مقدمات بھی درج کیے گئے ہیں جبکہ اسسٹنٹ کمشنرز نے کارروائی کرتے ہوئے ذمہ داران کو گرفتار کر کے حوالات منتقل کر دیا ہے۔
ڈپٹی کمشنر اسلام آباد نے بلا تفریق کارروائی جاری رکھنے کی ہدایت دیتے ہوئے کہا ہے کہ ون ڈش پالیسی پر سختی سے عمل درآمد یقینی بنایا جائے گا۔
ڈی سی اسلام آباد عرفان میمن نے شہریوں سے اپیل کی ہے کہ وہ ضلعی انتظامیہ کے ساتھ تعاون کریں تاکہ پالیسی پر مؤثر عمل درآمد ممکن بنایا جا سکے۔
مزید پڑھیے: پنجاب میں ون ڈش پر عملدرآمد اور غیر قانونی لاؤڈ اسپیکر کیخلاف کریک ڈاؤن کا فیصلہ
ادھر متعلقہ حکام نے واضح کیا ہے کہ وفاقی حکومت کی ون ڈش پالیسی پر ہر صورت عمل درآمد یقینی بنایا جائے گا۔
