2021 کے بعد افغانستان میں قائم ہونے والی طالبان حکومت کو استحکام اور بہتری کے دعوؤں کے باوجود عالمی اداروں کی رپورٹس ایک مختلف تصویر پیش کرتی ہیں۔ اقوام متحدہ اور عالمی بینک کے مطابق ملک میں سیکیورٹی، معیشت اور سماجی صورتحال مسلسل دباؤ کا شکار ہے، جبکہ عام شہریوں کی زندگی مزید مشکل ہوتی جا رہی ہے۔
یہ بھی پڑھیں:باجوڑ میں نہتے شہریوں پر حملہ: عطا تارڑ کی شدید مذمت اور افغان طالبان رجیم پر تنقید
افغانستان میں طالبان کے اقتدار کو 4 سال سے زائد عرصہ گزرنے کے باوجود حالات میں وہ بہتری نظر نہیں آئی جس کا دعویٰ کیا جاتا رہا ہے۔ عالمی رپورٹس کے مطابق حکومت کو 3 بڑے چیلنجز کا سامنا ہے: حکمرانی کا بحران، سیکیورٹی کی کمزوری اور عوامی فلاح کا فقدان۔
اقوام متحدہ کی سیکیورٹی کونسل کی نگرانی ٹیم کے مطابق افغانستان میں شدت پسند گروہوں خصوصاً ٹی ٹی پی کی موجودگی اور سرگرمیوں کے شواہد موجود ہیں۔ رپورٹ میں کہا گیا ہے کہ افغانستان کی سرزمین سے پاکستان میں متعدد حملے ہوئے جن کے باعث خطے میں کشیدگی بڑھ رہی ہے اور سرحدی تجارت بھی متاثر ہو رہی ہے۔
معاشی صورتحال کے حوالے سے عالمی بینک کی رپورٹ میں بتایا گیا ہے کہ اگرچہ مجموعی قومی پیداوار میں کچھ اضافہ دکھایا گیا ہے، لیکن آبادی میں تیزی سے اضافہ اور واپس آنے والے افراد کی بڑی تعداد کی وجہ سے فی کس آمدنی میں کمی واقع ہو رہی ہے۔ اس کے نتیجے میں عام شہری کی معاشی حالت بہتر ہونے کے بجائے مزید کمزور ہو رہی ہے۔
اقوام متحدہ کے ترقیاتی ادارے کے مطابق افغانستان میں تقریباً 2 تہائی آبادی غربت کا شکار ہے جبکہ کروڑوں افراد بنیادی انسانی ضروریات کے لیے امداد پر انحصار کر رہے ہیں۔ اسی طرح ملک کے بڑے حصے کو انسانی ہنگامی امداد کی ضرورت ہے۔
یہ بھی پڑھیں:چمن سیکٹر میں سیکیورٹی فورسز کی کارروائی، افغان طالبان کی متعدد پوسٹیں تباہ
رپورٹس میں یہ بھی بتایا گیا ہے کہ خواتین کی تعلیم اور روزگار پر پابندیوں کے باعث معیشت کا بڑا حصہ غیر فعال ہو چکا ہے۔ ماہرین کے مطابق اگر آبادی کے آدھے حصے کو معاشی سرگرمیوں سے باہر رکھا جائے تو ملک کی مجموعی ترقی متاثر ہونا لازمی ہے۔
سرحدی تنازعات، معاشی دباؤ، امدادی انحصار اور اندرونی پالیسیوں نے افغانستان کو ایک ایسے چکر میں دھکیل دیا ہے جہاں استحکام کے دعوے زمینی حقائق سے مطابقت نہیں رکھتے۔
بین الاقوامی ادارے خبردار کر رہے ہیں کہ اگر یہی صورتحال برقرار رہی تو افغانستان کی معیشت اور سماجی ڈھانچہ مزید کمزور ہو سکتا ہے، جبکہ عام شہریوں کی مشکلات میں اضافہ جاری رہے گا۔
