خیبرپختونخوا اور قبائلی علاقوں سے متعلق منظور پشتین اور پی ٹی ایم کی جانب سے پیش کیے گئے نکات کی حقیقت منظر عام پر آگئی۔ انسانی حقوق کی بات کرنے والے ملک میں ہونے والی دہشتگردی پر مکمل خاموش نظر آتے ہیں۔
رپورٹ کے مطابق ان علاقوں میں نقل مکانی اور بے دخلی کسی نسلی بنیاد پر نہیں ہوئی بلکہ اس کی بنیادی وجہ دہشتگردی، شدت پسند عناصر کی موجودگی اور ان کے محفوظ ٹھکانوں کے خلاف کارروائیاں تھیں۔
بعد ازاں ان علاقوں میں بحالی اور تعمیر نو کے لیے بڑے پیمانے پر اقدامات بھی کیے گئے تاکہ متاثرہ آبادی کو دوبارہ اپنے علاقوں میں آباد کیا جا سکے۔
رپورٹ کے مطابق قدرتی وسائل کے حوالے سے پالیسی آئینی ڈھانچے اور صوبائی انتظامی نظام کے تحت بنائی جاتی ہے اور اسے نسلی بنیادوں پر قبضے کے طور پر پیش کرنا ترقیاتی عمل کے بجائے تقسیم اور غلط فہمیوں کو جنم دیتا ہے۔
سیکیورٹی اداروں کی جانب سے کیے جانے والے انٹیلی جنس بیسڈ آپریشنز کا مقصد دہشتگردوں کے خلاف کارروائی کرنا ہوتا ہے جو بعض اوقات عام آبادی میں چھپے ہوتے ہیں، اور ان کارروائیوں میں شہری نقصان کو کم سے کم رکھنے کی کوشش کی جاتی ہے۔
رپورٹ کے مطابق دہشتگردی کے دوران پاکستان نے خود بھی بھاری جانی و مالی نقصان برداشت کیا، اور یہ صورتحال کسی یکطرفہ یا بیرونی طور پر طے شدہ جنگ کا نتیجہ نہیں بلکہ ملک کے اندر دہشتگردی اور شدت پسندی کے پھیلاؤ سے جڑی ہوئی ہے۔
مقامی سطح پر مختلف جرگوں اور عمائدین کی جانب سے بھی شدت پسند عناصر کے خلاف کارروائی کا مطالبہ سامنے آتا رہا ہے، جو اس بات کی دلیل ہے کہ کارروائیاں صرف ریاستی سطح پر نہیں بلکہ عوامی مطالبات کے تحت بھی کی گئیں۔
ریاستی اداروں میں تمام صوبوں کی نمائندگی موجود ہے اور فیصلے کسی نسلی بنیاد پر نہیں بلکہ ادارہ جاتی اور آئینی طریقہ کار کے تحت کیے جاتے ہیں۔ اسی طرح بعض تنظیموں یا سرگرمیوں پر پابندی ناگزیر وجوہات کی بنیاد پر کی جاتی ہے۔
رپورٹ کے مطابق ایسی کارروائیاں صرف ایک خطے تک محدود نہیں رہیں بلکہ ملک کے دیگر حصوں میں بھی اسی نوعیت کے اقدامات کیے گئے۔
سوشل میڈیا اگرچہ یہ معلومات کے پھیلاؤ کا ذریعہ ہے، تاہم بعض اوقات اس پر یکطرفہ یا جذباتی بیانیہ بھی سامنے آتا ہے جس سے صورتحال مکمل طور پر واضح نہیں رہتی۔
رپورٹ میں کہا گیا ہے کہ پشتونوں نے دہشتگردی سے شدید نقصان اٹھایا۔ امن کے لیے ضروری ہے کہ شدت پسندی کو مسترد کیا جائے۔
کسی بھی تنظیم کی جانب سے سڑکیں بند کرنے جیسے اقدامات عدم استحکام اور معاشی نقصان کا باعث بن سکتا ہے، کسی بھی مسئلے کے حل کے لیے جمہوری اور آئینی راستے موجود ہیں۔
پی ٹی ایم انسانی حقوق کی بات تو کرتی ہے لیکن دہشتگردی کی کارروائیوں کو نظر انداز کرکے یکطرفہ بیانیہ پیش کیا جاتا ہے۔
رپورٹ کے مطابق طویل مدتی استحکام کا راستہ بہتر حکمرانی، ترقی، سیاسی شمولیت، تعلیم اور سیکیورٹی میں ہے۔
