ستارہ امتیاز حاصل کرنے والے فوٹوگرافر عرفان احسن کا کہنا ہے کہ انہیں یہ اعزاز حکومت پاکستان کی جانب سے ان کے کام کی بنیاد پر دیا گیا ہے تاہم کچھ لوگ ان سے حسد کر رہے ہیں۔
یہ بھی پڑھیں: جنید صفدر کی شادی میں فوٹو شوٹ کرنے والے فوٹو گرافر نے ساری تفصیلات بیان کردیں
وی نیوز سے گفتگو کرتے ہوئے عرفان احسن نے کہا کہ انہوں نے فوٹوگرافی کو ایک نئی پہچان دی ہے اور اس فن کو آگے بڑھایا ہے۔
ان کے مطابق انہوں نے اگرچہ انجینیئرنگ میں ڈگری حاصل کی لیکن فوٹوگرافی کو بطور پیشہ اپنایا اور اس شعبے میں اپنی الگ شناخت بنائی۔ انہوں نے بتایا کہ ان کے متعدد شاگرد ہیں جو ان سے یہ ہنر سیکھ رہے ہیں۔
مزید پڑھیے: وائلڈ لائف فوٹو گرافی لگن اور جذبے کا تقاضا کرتی ہے۔ بلوچستان کا پہلا وائلڈ لائف فوٹوگرافر
عرفان احسن نے کہا کہ انہیں یہ ایوارڈ کسی مخصوص فوٹو شوٹ، بشمول وزیراعلیٰ پنجاب مریم نواز کے بیٹے جنید صفدر کی شادی کی کوریج کی وجہ سے نہیں ملا بلکہ یہ ان کے مجموعی کام کا اعتراف ہے۔ ان کے مطابق وہ جنگی فوٹوگرافی نہیں کرتے لیکن اعلیٰ معیار کی فوٹوگرافی کرتے ہیں۔
انہوں نے مزید کہا کہ وہ عمران خان کی پورٹریٹ فوٹوگرافی کر چکے ہیں، شہباز شریف کی بطور وزیراعظم تصاویر بنا چکے ہیں جبکہ شرمیلا فاروقی سمیت متعدد بڑے ناموں کے فوٹو شوٹس بھی کر چکے ہیں۔
مزید پڑھیں: کیا مریم نواز کے صاحبزادے کی شادی کی فوٹوگرافی کرنے پر عرفان احسن کو ستارۂ امتیاز کے لیے نامزد کیا گیا؟
عرفان احسن کا کہنا تھا کہ کچھ لوگوں کو ان کا یہ اعزاز ہضم نہیں ہو رہا تاہم وہ دعا کرتے ہیں کہ اللہ سب کو حسد سے محفوظ رکھے۔
