اسلام آباد ہائیکورٹ میں پاکستان تحریک انصاف (پی ٹی آئی) کے بانی عمران خان کے ایکس اکاؤنٹ کی بندش اور بشریٰ بی بی کو ذاتی معالج تک رسائی سے متعلق دائر درخواستیں سماعت کے لیے مقرر کر دی گئی ہیں۔
اسلام آباد ہائیکورٹ میں دونوں کیسز کی سماعت کل جسٹس ارباب محمد طاہر کریں گے۔
عدالتی ریکارڈ کے مطابق اڈیالہ جیل حکام پہلے ہی اپنا جواب جمع کرا چکے ہیں، جبکہ عدالت نے دیگر متعلقہ فریقین کو بھی جواب داخل کرنے کی ہدایت جاری کر رکھی ہے۔
عمران خان کی جانب سے دائر درخواست کی پیروی وکیل سلمان اکرم راجا کر رہے ہیں۔ اس کیس میں عدالت نے انہیں بانی پی ٹی آئی سے مشاورت کے لیے ملاقات کی اجازت دی تھی، تاہم عدالتی حکم کے باوجود یہ ملاقات نہیں ہو سکی۔
دوسری جانب بشریٰ بی بی سے متعلق معاملہ بھی عدالت میں زیر سماعت ہے، جس میں ان کی بیٹی مبشرہ خاور مانیکا نے درخواست دائر کی ہے۔
درخواست میں مؤقف اختیار کیا گیا ہے کہ بشریٰ بی بی تک ذاتی معالج اور فیملی کی رسائی دی جائے۔
اسلام آباد ہائیکورٹ کے رجسٹرار آفس نے بشریٰ بی بی سے متعلق درخواست کو باقاعدہ نمبر الاٹ کرتے ہوئے سماعت کے لیے مقرر کر دیا ہے۔
