پاکستان اسٹاک ایکسچینج نے نئے ہفتے کا آغاز مثبت انداز میں کیا، جہاں پیر کے روز ٹریڈنگ کے دوران بینچ مارک کے ایس ای 100 انڈیکس میں تقریباً 3,000 پوائنٹس کا اضافہ ریکارڈ کیا گیا۔
دوپہر 2 بجے کے وقت انڈیکس 165,948.47 پر موجود تھا، جو 2,954.30 پوائنٹس یعنی 1.81 فیصد اضافہ ظاہر کرتا ہے۔
یہ بھی پڑھیں: عالمی معیشت میں بہتری: اسٹاک مارکیٹ اور سونے چاندی میں سرمایہ کاری کب کی جائے؟
مارکیٹ میں خریداری کا رجحان آٹو موبائل اسمبلرز، سیمنٹ، کمرشل بینکس، تیل و گیس کی تلاش کرنے والی کمپنیوں، آئل مارکیٹنگ کمپنیز، پاور جنریشن اور ریفائنری کے شعبوں میں دیکھا گیا۔
نیشنل بینک، اٹک ریفائنری لمیٹڈ، حبکو، پاکستان پیٹرولیم لمیٹڈ، حبیب بینک، مسلم کمرشل بینک، پاکستان آئل فیلڈز لمیٹڈ اور یونائیٹڈ بینک لمیٹڈ جیسے بڑے انڈیکس شیئرز مثبت زون میں ٹریڈ کرتے رہے۔
Market is up at midday 🚀
⏳ KSE 100 is positive by +3249.26 points (+1.99%) at midday trading. Index is at 166,243.43 and volume so far is 182.83 million shares (12:00 PM) pic.twitter.com/5ymkupMx4p— Investify Pakistan (@investifypk) May 4, 2026
گزشتہ ہفتے پاکستان کی ایکویٹی مارکیٹ شدید دباؤ کا شکار رہی، جہاں مسلسل جغرافیائی غیر یقینی صورتحال اور مالی حالات کی سختی نے سرمایہ کاروں کے اعتماد کو متاثر کیا۔
کے ایس ای 100 انڈیکس میں 4.5 فیصد کمی ہوئی اور یہ 7,677.87 پوائنٹس گر کر 162,994.17 پر بند ہوا۔
مزید پڑھیں: پاکستان اسٹاک مارکیٹ کی تاریخی بلندی کا ملک کی معیشت سے کتنا تعلق ہے؟
عالمی سطح پر پیر کے روز ایشیا میں شیئرزمیں معمولی اضافہ جبکہ تیل کی قیمتیں مستحکم رہیں۔ سرمایہ کار مشرق وسطیٰ کے تنازع میں جزوی پیش رفت سے کچھ حد تک مطمئن نظر آئے۔
امریکی صدر ڈونلڈ ٹرمپ نے کہا کہ امریکا پیر کی صبح آبنائے ہرمز میں پھنسے ہوئے بحری جہازوں کو نکالنے کی کوشش شروع کرے گا، تاہم اس منصوبے کی تفصیلات نہیں بتائیں۔
سینٹرل کمانڈ کے مطابق اس آپریشن میں گائیڈڈ میزائل ڈسٹرائرز، 100 سے زائد زمینی و سمندری طیارے اور 15 ہزار اہلکار شامل ہوں گے۔
ایران نے کہا کہ امریکا نے پاکستان کے ذریعے اس کی 14 نکاتی تجویز کا جواب دیا ہے اور وہ اس کا جائزہ لے رہا ہے، تاہم ٹرمپ نے کہا کہ اس تجویز کے قبول ہونے کے امکانات کم ہیں۔
مزید پڑھیں: اسٹاک ایکسچینج میں زبردست دباؤ، 100 انڈیکس میں تقریباً 4 فیصد کمی ریکارڈ
برینٹ کروڈ آئل 108.30 ڈالر فی بیرل پر مستحکم رہا جبکہ امریکی خام تیل 102.01 ڈالر پر برقرار رہا۔
جاپان میں تعطیل کے باعث عالمی مارکیٹس میں ٹریڈنگ کم رہی۔ ایشیا پیسیفک کے حصص میں 0.6 فیصد اضافہ جبکہ جنوبی کوریا کے اسٹاکس میں 2.6 فیصد اضافہ دیکھا گیا۔
