پاکستان میں سرمایہ مارکیٹ کو مضبوط بنانے اور سرمایہ کاروں کی شمولیت بڑھانے کے لیے ایک اہم پیش رفت کے تحت کیپیٹل مارکیٹ ڈویلپمنٹ فنڈ قائم کر دیا گیا ہے۔
یہ فنڈ بدھ کے روز اسلام آباد میں منعقدہ ایک تقریب کے دوران باضابطہ طور پر تشکیل دیا گیا، جس کا مقصد مالیاتی خواندگی کو فروغ دینا، مالی شمولیت کو وسعت دینا اور ریٹیل سرمایہ کاروں کی تعداد میں اضافہ کرنا ہے۔
یہ بھی پڑھیے: امریکا ایران مذاکرات میں پیشرفت کی خبروں پر عالمی مارکیٹ میں تیل کی قیمتیں گر گئیں
اس موقع پر محمد اورنگزیب نے کہا کہ حالیہ علاقائی کشیدگی نے اس بات کو واضح کیا ہے کہ پاکستان کو اپنے وسائل پر انحصار بڑھانا ہوگا اور معاشی خود کفالت کی طرف بڑھنا ہوگا۔ ان کے مطابق سرمایہ مارکیٹ ملکی ترقی کے لیے مالی وسائل فراہم کرنے میں کلیدی کردار ادا کر سکتی ہے۔
تقریب میں پاکستان اسٹاک ایکسچینج، سینٹرل ڈپازٹری کمپنی، نیشنل کلیئرنگ کمپنی، پاکستان مرکنٹائل ایکسچینج اور انسٹی ٹیوٹ آف فنانشل مارکیٹس آف پاکستان سمیت اہم اداروں نے اس فنڈ میں شمولیت اختیار کی۔
سیکیورٹیز اینڈ ایکسچینج کمیشن آف پاکستان کے چیئرمین ڈاکٹر کبیر احمد سدھو نے کہا کہ ملک میں سرمایہ کاروں کی شرح اب بھی ایک فیصد سے کم ہے، تاہم آئندہ برسوں میں اسے 25 لاکھ تک بڑھانے کا ہدف رکھا گیا ہے۔
یہ بھی پڑھیے: اسٹاک مارکیٹ میں اعتماد بحال، سرمایہ کار اکاؤنٹس میں ریکارڈ اضافہ
منتظمین کے مطابق فنڈ کو ابتدائی طور پر 12 کروڑ روپے سے فعال کیا جائے گا جبکہ شریک ادارے اپنی سالانہ آمدن کا ایک فیصد اس میں شامل کریں گے تاکہ یہ پائیدار بنیادوں پر کام کر سکے۔
تقریب میں بتایا گیا کہ اپریل 2026 میں تقریباً 24 ہزار نئے سرمایہ کار مارکیٹ میں شامل ہوئے، جو سرمایہ کاری کے بڑھتے رجحان کی علامت ہے۔
حکام کے مطابق یہ اقدام پاکستان کی مالیاتی منڈیوں کو جدید بنانے اور معیشت کو مستحکم بنیادوں پر آگے بڑھانے میں اہم کردار ادا کرے گا۔
