امریکا میں مصنوعی ذہانت(اے آئی) کے بڑھتے ہوئے ڈھانچے اور ڈیٹا سینٹرز کے قیام کے خلاف عوامی غصے میں تیزی سے اضافہ ہو رہا ہے، جہاں ایک حالیہ سروے کے مطابق 43 فیصد امریکیوں کا ماننا ہے کہ ڈیٹا سینٹرز کے بے پناہ توانائی استعمال کرنے سے ان کے بجلی کے بل بڑھ رہے ہیں۔
اسٹینفورڈ یونیورسٹی کے پروفیسر انجنی میدھا نے، جو اے آئی انفراسٹرکچر کے ماہر مانے جاتے ہیں، متنبہ کیا ہے کہ مقامی کمیونٹیز کی جانب سے ان منصوبوں کی مخالفت محض ترقی کی مخالفت نہیں بلکہ ڈیٹا سینٹرز کے اثرات اور مقاصد کے حوالے سے شفافیت کی کمی کا نتیجہ ہے۔
یہ بھی پڑھیں: بجلی کی بچت: میٹا کا اپنے ڈیٹا سینٹرز شمسی توانائی سے چلانے کا منصوبہ
پروفیسر میدھا کا کہنا ہے کہ لوگ ان منصوبوں کے گرد گھومنے والے پراسرار ماحول سے نالاں ہیں، کیونکہ بجلی کے بڑھتے ہوئے اخراجات، ماحولیاتی بگاڑ، شور کی آلودگی اور معیارِ زندگی میں کمی جیسے خدشات کے انہیں براہِ راست جوابات نہیں مل رہے۔
انہوں نے ایک پوڈ کاسٹ کے دوران گفتگو کرتے ہوئے کہا کہ جب کمپنیاں یہ بتانے میں ناکام رہتی ہیں کہ ڈیٹا سینٹرز سے عوام کو کیا فائدہ پہنچے گا یا ان کے منفی اثرات کو کیسے کم کیا جائے گا، تو لوگ بدترین صورتحال کا تصور کرتے ہوئے ان کے خلاف متحد ہوجاتے ہیں۔
یہ بھی پڑھیں: مصنوعی ذہانت کے ڈیٹا سینٹرز جدید جنگ کا نیا محاذ بن گئے
دوسری جانب سیاسی سطح پر بھی دباؤ بڑھ رہا ہے، جہاں سینیٹر برنی سینڈرز اور الیگزینڈریا اوکاسیو کورٹیز نے وفاقی سطح پر نئے ڈیٹا سینٹرز کی تعمیر پر پابندی کی تجویز دی ہے، جبکہ ریاست مین سمیت دیگر کئی ریاستوں میں بھی اسی طرح کے قوانین زیرِ غور ہیں۔ پ
روفیسر میدھا نے کسی سوچے سمجھے منصوبے کے بغیر تیز رفتار توسیع اور سرے سے ترقی روک دینے کے حوالے سے مشورہ دیا ہے کہ انفراسٹرکچر کی تعمیر کے ساتھ ساتھ عوام کے خدشات کو سننا ناگزیر ہے۔
یہ بھی پڑھیں: ڈیٹا سینٹرز میں بجلی کی بے تحاشا کھپت، اوپن اے آئی نے حل ڈھونڈ لیا
انہوں نے تجویز دی ہے کہ ڈیٹا سینٹرز کے لیے ’نیوٹریشنل لیبل‘ جیسا ایک معیار مقرر کیا جانا چاہیے، جس میں ان کے توانائی کے استعمال اور ماحول و معاشرے پر پڑنے والے اثرات کی واضح تفصیلات درج ہوں، تاکہ کسی بھی منصوبے کو شروع کرنے سے پہلے عوام کا بھرپور اعتماد حاصل کیا جاسکے۔
