بنگلہ دیش کے خلاف پہلے ٹیسٹ میچ میں پاکستان نے دوسرے روز کے کھیل کے اختتام تک اپنی پہلی اننگز میں ایک وکٹ کے نقصان پر 179 رنز اسکور کرلیے۔
مزید پڑھیں: بنگلہ دیش کا بھارت اور چین کے مہنگے بجلی منصوبوں پر نظرثانی کا فیصلہ
نوجوان بیٹر اذان اویس 84 جبکہ عبداللّٰہ فضل 37 رنز کے ساتھ وکٹ پر موجود ہیں، اور دونوں کھلاڑی اپنے کیریئر کا پہلا ٹیسٹ میچ کھیل رہے ہیں۔
پاکستان کو اننگز کا واحد نقصان 101 رنز پر اٹھانا پڑا، جب امام الحق 45 رنز بنانے کے بعد مہدی حسن میراز کی گیند پر آؤٹ ہوگئے۔ اس سے قبل قومی ٹیم نے محتاط لیکن مضبوط آغاز کیا تھا۔
میرپور کے شیرِ بنگلا کرکٹ اسٹیڈیم میں جاری میچ کے دوسرے دن بنگلادیش نے اپنی پہلی اننگز 301 رنز سے دوبارہ شروع کی۔
مشفق الرحیم اور لٹن داس نے بیٹنگ کا آغاز کیا، جہاں مشفق الرحیم نے جلد ہی اپنی نصف سنچری مکمل کرلی اور ٹیم کا اسکور آگے بڑھایا۔
تاہم بعد ازاں پاکستانی بولرز نے شاندار کم بیک کرتے ہوئے وقفے وقفے سے وکٹیں حاصل کیں، جس کے باعث بنگلادیشی ٹیم پہلے دن کے اسکور میں صرف 112 رنز کا اضافہ کرسکی اور پوری ٹیم 413 رنز پر ڈھیر ہوگئی۔
بنگلہ دیش کی جانب سے پہلے روز نجم الحسن شانتو نے 101 اور مومن الحق نے 91 رنز بنائے تھے، جبکہ محمود الحسن جوائے 8 اور شادمان اسلام 13 رنز بنا کر آؤٹ ہوئے۔
دوسرے دن مشفق الرحیم 71، لٹن داس 33، مہدی حسن میراز 10 اور تیج الاسلام 17 رنز بنا سکے۔
مزید پڑھیں: ڈھاکا ٹیسٹ: پاکستان کیخلاف بنگلہ دیش کی گرفت مضبوط، شانتو کی شاندار سینچری
پاکستان کی طرف سے محمد عباس نے عمدہ بولنگ کرتے ہوئے 5 وکٹیں حاصل کیں، جبکہ شاہین شاہ آفریدی نے 3 کھلاڑیوں کو آؤٹ کیا۔ نعمان علی اور حسن علی نے ایک، ایک وکٹ اپنے نام کی۔
