اسلام آباد پولیس کے ترجمان کے مطابق دارالحکومت میں معرکہ حق اور آپریشن بنیان المرصوص کی مناسبت سے خصوصی تقریبات کا انعقاد کیا گیا، جن میں آئی جی اسلام آباد سید علی ناصر رضوی نے ڈی چوک تقریب میں شرکت کی اور خطاب کیا۔
یہ بھی پڑھیں:معرکہ حق جشن آزادی تقریبات، اسلام آباد پولیس نے ٹریفک پلان جاری کردیا
آئی جی اسلام آباد سید علی ناصر رضوی نے اپنے خطاب میں کہا کہ ہم ہیں بنیان مرصوص، ہمارا جینا مرنا پاکستان اور قومی اتحاد کے لیے ہے۔ انہوں نے کہا کہ افواجِ پاکستان نے آج کے دن پوری قوم کا سر فخر سے بلند کیا ہے۔
انہوں نے کہا کہ بنیان مرصوص صرف ایک آپریشن نہیں بلکہ ایک نظریہ اور طرزِ زندگی ہے، جبکہ پاکستانی قوم سیسہ پلائی ہوئی دیوار کی مانند متحد ہے۔ ان کا کہنا تھا کہ اگر دشمن نے میلی آنکھ سے دیکھا تو پوری قوم پہلے سے زیادہ مضبوط ہو کر سامنے آئے گی۔
یہ بھی پڑھیں:معرکہ حق کے بعد پاکستان مسلسل آگے بڑھ رہا ہے، اسلام آباد کے نوجوانوں کی رائے
آئی جی اسلام آباد نے کہا کہ معرکہ حق میں افواجِ پاکستان نے اپنی صلاحیتوں کا لوہا منوایا اور دشمن کا غرور خاک میں ملا دیا گیا، جس کے بعد پاکستان ایک ناقابلِ تسخیر قوت کے طور پر ابھرا ہے۔
انہوں نے کہا کہ پاک فوج، پاک فضائیہ اور سکیورٹی ادارے بنیان المرصوص کی عملی تصویر ہیں، جبکہ فیلڈ مارشل سید عاصم منیر کی قیادت میں افواجِ پاکستان نے تاریخ ساز کامیابی حاصل کی۔
خطاب میں کہا گیا کہ معرکہ حق کے دوران قوم نے بے مثال اتحاد کا مظاہرہ کیا، اور پاکستانی عوام کا جذبہ اس حد تک بلند تھا کہ وہ وطن کے دفاع کے لیے ہر محاذ پر جانے کے لیے تیار تھے۔
آئی جی اسلام آباد نے مزید کہا کہ اسلام آباد پولیس کی 11 ہزار فورس اور 44 لاکھ شہری افواجِ پاکستان کے شانہ بشانہ کھڑے ہیں۔ انہوں نے واضح پیغام دیا کہ پاکستان کے خلاف سازش کرنے والے اپنی حدود میں رہیں۔
انہوں نے کہا کہ ہر پاکستانی جوان، ہر بیٹی، ہر طالبعلم اور ہر پولیس اہلکار بنیان المرصوص کا حصہ ہے۔
آئی جی اسلام آباد کے مطابق پاکستان آج عالمِ اسلام میں ایک مرکزی قوت کے طور پر ابھر رہا ہے اور معرکۂ حق کی کامیابی ہمیشہ قومی تاریخ کا سنہری باب رہے گی۔
