جنوبی کوریا میں کئی برسوں سے جاری آبادی میں کمی کے خدشات کے درمیان شرحِ پیدائش میں معمولی اضافہ ریکارڈ کیا گیا ہے، جسے ماہرین محتاط انداز میں مثبت پیشرفت قرار دے رہے ہیں۔
جنوبی کوریا دنیا کے اُن ممالک میں شامل ہے جہاں شرحِ پیدائش سب سے کم ہے، جبکہ حکومت کئی برسوں سے شہریوں کو بچوں کی پیدائش کی ترغیب دینے کے لیے اربوں ڈالر خرچ کر رہی ہے۔
مزید پڑھیں:جنوبی کوریا میں نیند کا بحران، انوکھا مقابلہ توجہ کا مرکز بن گیا
سرکاری اعداد و شمار کے مطابق 2023 میں ریکارڈ کم ترین سطح پر پہنچنے کے بعد شرحِ پیدائش میں کچھ بہتری دیکھی گئی ہے۔ فروری 2026 میں قریباً 23 ہزار بچوں کی پیدائش ریکارڈ کی گئی، جو گزشتہ 7 برس میں فروری کے مہینے کی بلند ترین تعداد ہے۔
32 سالہ کم سو جن، جو موسیقی کی صنعت سے وابستہ ہیں، نے بتایا کہ مالی خدشات کے باوجود انہوں نے اور ان کے شوہر نے والدین بننے کا فیصلہ کیا کیونکہ ان کے خیال میں بچے کی آمد خوشی کا باعث بنتی ہے۔
ماہرین کے مطابق حالیہ اضافے کی ایک وجہ نوجوان نسل میں خاندان اور بچوں کے حوالے سے بدلتا ہوا مثبت رویہ بھی ہو سکتا ہے، جبکہ بعض ماہرین حکومتی مراعات کو اس تبدیلی کا اہم سبب قرار دے رہے ہیں۔
حکومت کی جانب سے بچوں کی پیدائش پر مالی امداد، زچگی کے اخراجات، سفری سہولیات، کم شرح سود پر گھریلو قرضے، والدین کی رخصت اور بانجھ پن کے علاج کے لیے معاونت جیسے اقدامات متعارف کرائے گئے ہیں۔
مزید پڑھیں:جنوبی کوریا کا شمالی کوریا میں ڈرون بھیجنے کا اعتراف، اظہار افسوس بھی کردیا
تاہم بعض شہریوں کا کہنا ہے کہ مالی مراعات کے باوجود رہائش، مہنگی تعلیم، بچوں کی اضافی تدریس، ملازمتوں کا عدم تحفظ اور مصنوعی ذہانت کے باعث روزگار کے خدشات جیسے مسائل اب بھی خاندان بڑھانے کے فیصلے میں بڑی رکاوٹ ہیں۔
ماہرینِ آبادیات کے مطابق جنوبی کوریا کی مجموعی شرحِ پیدائش اب بھی آبادی برقرار رکھنے کے لیے درکار شرح 2.1 سے کہیں کم یعنی صرف 0.8 ہے، اس لیے موجودہ اضافہ طویل المدتی حل ثابت ہوگا یا نہیں، اس بارے میں ابھی کچھ کہنا قبل از وقت ہے۔
