قائمقام صدر آزاد جموں و کشمیر چوہدری لطیف اکبر نے جنرل آفیسر کمانڈنگ کے ہمراہ نڑول اسٹیڈیم مظفرآباد میں یومِ فتح معرکۂ حق کے موقع پر پاک فوج کے زیرِ اہتمام دفاعی ساز و سامان کی شاندار نمائش کا افتتاح کردیا، جس میں شہریوں اور طلبہ کی بڑی تعداد نے شرکت کی۔
یہ بھی پڑھیں:معرکہ حق کا ایک سال مکمل، مظفرآباد میں پروقار تقریب، ’پاکستان زندہ باد، پاک فوج زندہ باد‘ کے نعروں کی گونج
مظفرآباد میں یومِ فتح معرکۂ حق کے موقع پر پاک فوج کے زیرِ اہتمام نڑول اسٹیڈیم میں دفاعی ساز و سامان کی نمائش کا انعقاد کیا گیا، جس کا افتتاح قائمقام صدر آزاد جموں و کشمیر چوہدری لطیف اکبر نے جنرل آفیسر کمانڈنگ کے ہمراہ کیا۔
افتتاحی تقریب میں حکومت آزاد کشمیر کے سیکریٹریز، مختلف محکموں کے اعلیٰ افسران، سیاسی و سماجی شخصیات، طلبہ، شہریوں اور پاک فوج کے افسران و جوانوں کی بڑی تعداد نے شرکت کی۔
اس موقع پر پاک فوج کی جانب سے جدید دفاعی ساز و سامان، اسلحہ، مواصلاتی نظام، جنگی گاڑیوں اور دیگر عسکری آلات کی نمائش کی گئی، جسے دیکھنے کے لیے شہریوں اور بالخصوص نوجوانوں میں گہری دلچسپی دیکھی گئی۔
شرکاء نے افواجِ پاکستان کی پیشہ ورانہ مہارت، نظم و ضبط اور دفاعی صلاحیتوں کو خراجِ تحسین پیش کیا۔ شہریوں کا کہنا تھا کہ ایسی تقریبات نوجوان نسل میں حب الوطنی اور قومی شعور کو اجاگر کرنے میں اہم کردار ادا کرتی ہیں۔
