معرکہ حق کا ایک سال مکمل ہونے کے موقع پر ملک بھر میں تقریبات کا سلسلہ جاری ہے، اسی سلسلے میں آزاد کشمیر کے دارالحکومت مظفرآباد میں بھی ایک پروقار تقریب کا انعقاد کیا گیا۔
تقریب میں بھارت کے خلاف معرکہ حق کی کامیابی پر مبنی ایک دستاویزی فلم دکھائی گئی، نہتے اور مظلوم کشمیریوں پر بھارتی مظالم سے متعلق فلم نے حاضرین کو افسردہ کر دیا۔
آزاد کشمیر،مظفرآباد میں معرکۂ حق کے حوالے سے تقریب۔ pic.twitter.com/vfD4dVdR6W
— WE News (@WENewsPk) May 6, 2026
تقریب میں شہریوں کی بڑی تعداد نے شرکت کی اور ’پاکستان زندہ باد‘ اور ’پاک فوج زندہ باد‘ کے نعروں سے فضا گونج اٹھی۔ اس موقع پر شہدا اور غازیوں کو زبردست خراجِ عقیدت پیش کیا گیا۔
تقریب میں معروف گلوکارہ آئمہ بیگ اور علی عظمت سمیت دیگر معروف گلوکاروں نے پرفارم کرکے تقریب کو چار چاند لگا دیے۔
پروگرام کے دوران مختلف ملی نغمے پیش کیے گئے، جبکہ بچوں نے ٹیبلو بھی پیش کیا۔ کشمیری ثقافت سے جڑے نغموں نے بھی محفل کو چار چاند لگا دیے۔ شرکا نے پاکستان اور کشمیر کے پرچم لہرا کر یکجہتی کا اظہار کیا۔
تقریب میں نتاشہ خان اور ڈاکٹر عبدالباسط سمیت دیگر فنکاروں نے بھی ملی نغمے پیش کیے۔
تقریب میں ملک کی سلامتی اور استحکام کے لیے خصوصی دعائیں کی گئیں، طلبہ نے معرکہ حق کی کامیابی پر پاک فوج کو زبردست خراجِ تحسین پیش کرتے ہوئے جوشیلے نعرے بھی لگائے۔
