گزشتہ روز خیبرپختونخوا کے مختلف اضلاع میں تیز ہواؤں، آندھی اور بارش کے باعث مختلف حادثات میں اب تک 4 افراد جاں بحق جبکہ 16 افراد زخمی ہوئے ہیں۔
پراونشل ڈیزاسٹر مینجمنٹ اتھارٹی (پی ڈی ایم اے) نے صوبے بھر میں ہونیوالے نقصانات کی ابتدائی رپورٹ جاری کر دی ہے۔
پی ڈی ایم اے کے مطابق شدید آندھی اور بارش کے دوران گھروں کی دیواریں اور چھتیں گرنے کے واقعات پیش آئے، جن کے نتیجے میں جانی نقصان ہوا۔
یہ بھی پڑھیں: بالائی خیبر پختونخوا میں گلاف الرٹ جاری، شدید بارشوں اور فلیش فلڈ کا خدشہ
جاں بحق افراد میں 2 مرد، ایک خاتون اور ایک بچہ شامل ہیں، جبکہ زخمیوں میں ایک خاتون، 8 مرد اور 7 بچے شامل ہیں۔
رپورٹ کے مطابق حادثات مردان، صوابی، مالاکنڈ اور شانگلہ کے مختلف علاقوں میں پیش آئے۔
پی ڈی ایم اے کا کہنا ہے کہ ضلعی انتظامیہ اور متعلقہ ادارے مکمل طور پر الرٹ ہیں اور ایک دوسرے کے ساتھ قریبی رابطے میں ہیں تاکہ متاثرہ علاقوں میں بروقت امدادی سرگرمیاں جاری رکھی جا سکیں۔
مزید پڑھیں: شیشپر گلیشیئر سرکنے سے انسانی آبادی کو خطرہ لاحق، ماہرین نے وارننگ جاری کردی
پی ڈی ایم اے نے متعلقہ ضلعی انتظامیہ کو ہدایت جاری کی ہے کہ متاثرین کو جلد از جلد ریلیف فراہم کیا جائے اور زخمیوں کو فوری طبی امداد کی فراہمی یقینی بنائی جائے۔
ادارے کے مطابق بارشوں اور تیز ہواؤں کا موجودہ سلسلہ 12 مئی تک وقفے وقفے سے جاری رہنے کا امکان ہے، جس کے پیش نظر شہریوں کو احتیاطی تدابیر اختیار کرنے کی ہدایت کی گئی ہے۔
ترجمان پی ڈی ایم اے کے مطابق ایمرجنسی آپریشن سنٹر مکمل طور پر فعال ہے اور عوام کسی بھی معلومات، آگاہی یا ناخوشگوار واقعے کی اطلاع ہیلپ لائن 1700 پر دے سکتے ہیں۔
