ماہرین کے مطابق انسانی دماغ کو صحت مند اور فعال رکھنے کے لیے اسے مسلسل چیلنجز اور ذہنی سرگرمیوں کی ضرورت ہوتی ہے تاہم اس کے لیے ہمیشہ مشکل یا تھکا دینے والی سرگرمیاں ضروری نہیں ہوتیں۔ روزمرہ زندگی میں چھوٹی اور خوشگوار تبدیلیاں بھی دماغ کی عمر بڑھنے کے عمل کو سست کرنے میں مددگار ثابت ہو سکتی ہیں۔
یہ بھی پڑھیں: مکھی کا دماغ خودکار گاڑیوں میں استعمال ہوسکتا ہے، برطانوی تحقیق نے نیا راستہ دکھا دیا
بی بی سی کے مابق ایک تحقیق سے معلوم ہوا ہے کہ جیسے جیسے انسان کی عمر بڑھتی ہے اس کے صحت مند زندگی کے سال کم ہوتے جاتے ہیں اور ذہنی صحت متاثر ہونے کا خطرہ بھی بڑھ جاتا ہے۔ تاہم ماہرین کا کہنا ہے کہ اگر دماغ کو فعال رکھا جائے تو ’کگنیٹو ریزرو‘ یعنی ذہنی ذخیرہ مضبوط ہوتا ہے جو دماغ کو عمر رسیدگی کے اثرات سے بچانے میں مدد دیتا ہے۔
ماہر نفسیات ایلن گو کے مطابق چھوٹی چھوٹی ذہنی، جسمانی اور سماجی سرگرمیاں دماغی صلاحیتوں کو بہتر بنا سکتی ہیں اور اس کے لیے زندگی میں بڑی تبدیلیاں ضروری نہیں ہوتیں۔
جگہوں کی سمت سمجھنے کی مشق
ماہرین کا کہنا ہے کہ دماغ کا ایک اہم حصہ، جسے ہپوکیمپس کہا جاتا ہے، سمت اور راستہ یاد رکھنے میں بنیادی کردار ادا کرتا ہے اور یہی حصہ الزائمر جیسے مرض میں سب سے پہلے متاثر ہوتا ہے۔
مزید پڑھیے: اے آئی کا زیادہ استعمال دماغ کو سست بنا رہا ہے، کن صلاحیتوں کو شدید خطرہ ہے؟
تحقیق کے مطابق وہ افراد جو اپنے شہر میں راستے یاد رکھنے یا بغیر جی پی ایس کے سفر کرنے کی عادت رکھتے ہیں ان کا دماغ زیادہ مضبوط رہتا ہے۔
اسی طرح کچھ مطالعات میں یہ بھی دیکھا گیا کہ ٹیکسی اور ایمبولینس ڈرائیورز میں یادداشت کی بیماری کی شرح نسبتاً کم ہوتی ہے کیونکہ وہ مسلسل ذہنی نقشہ استعمال کرتے ہیں۔
سماجی طور پر متحرک رہنا
ماہرین کے مطابق دوسروں کے ساتھ میل جول اور گفتگو دماغی صحت کے لیے انتہائی مفید ہے۔
مزید پڑھیں: لوگوں کے نام دماغ سے جلدی نکل جاتے ہیں تو یہ آسان ورزش کرلیں
تحقیق سے معلوم ہوا ہے کہ سماجی سرگرمیوں میں حصہ لینے والے افراد میں ذہنی کمزوری اور ڈیمنشیا کا خطرہ کم ہوتا ہے۔ گفتگو، بحث اور خیالات کے تبادلے سے دماغ کے مختلف حصے متحرک رہتے ہیں جبکہ تنہائی اور ذہنی دباؤ دماغی خلیوں کو نقصان پہنچا سکتا ہے۔
سماجی تعلقات نہ صرف ذہنی دباؤ کم کرتے ہیں بلکہ یادداشت اور سوچنے سمجھنے کی صلاحیت کو بھی بہتر بناتے ہیں۔
عمر بھر سیکھنے کا عمل جاری رکھنا
ماہرین کے مطابق مسلسل سیکھنے کی عادت دماغ کو مضبوط رکھنے کا ایک اہم ذریعہ ہے۔ نئی چیزیں سیکھنے سے دماغ میں نئے نیورونز بنتے ہیں اور پرانے نیورونز مضبوط ہوتے ہیں جسے دماغ کی لچک یا نیوروپلاسٹیسٹی کہا جاتا ہے۔
تحقیق سے ثابت ہوا ہے کہ زیادہ تعلیم حاصل کرنے اور زندگی بھر سیکھنے والے افراد میں یادداشت کی بیماری کا خطرہ کم ہوتا ہے۔
ماہرین کا کہنا ہے کہ باغبانی، کتابیں پڑھنا، نئے مشاغل اپنانا یا دوستوں کے ساتھ علمی گفتگو کرنا دماغی صحت کو بہتر بنانے کے آسان طریقے ہیں۔
یہ بھی پڑھیے: کچھ غم دماغ سے ہمیشہ کے لیے چپک کر رہ جاتے ہیں، وجہ کیا ہے؟
مجموعی طور پر ماہرین اس بات پر متفق ہیں کہ دماغ کو فعال رکھنے والی ہر سرگرمی عمر رسیدگی کے اثرات کو سست کر سکتی ہے اور زندگی کو نہ صرف صحت مند بلکہ زیادہ خوشگوار بھی بنا سکتی ہے۔
