پاکستان کرکٹ بورڈ نے پاکستان اور آسٹریلیا کے درمیان 3 ایک روزہ میچوں کی سیریز کے لیے میچ آفیشلز کا اعلان کر دیا ہے۔ سیریز 30 مئی سے 4 جون تک راولپنڈی اور لاہور میں کھیلی جائے گی، جبکہ سری لنکا کے سابق ٹیسٹ کرکٹر گریم لا بروئے تمام میچوں میں میچ ریفری کی ذمہ داریاں انجام دیں گے۔
یہ بھی پڑھیں:بنگلہ دیشی مؤقف کی حمایت، پاکستان کرکٹ بورڈ نے آئی سی سی کو باضابطہ خط لکھ دیا
پاکستان کرکٹ بورڈ کے مطابق سری لنکا کے گریم لا بروئے، جنہوں نے 1986 سے 1992 کے دوران 9 ٹیسٹ اور 44 ون ڈے میچز کھیلے، سیریز میں پلیئنگ کنٹرول ٹیم کی سربراہی کریں گے۔
سیریز میں پاکستان کے احسن رضا، انگلینڈ کے رچرڈ کیٹلبرو اور سری لنکا کے کمار دھرماسینا، جو آئی سی سی ایلیٹ پینل آف امپائرز کا حصہ ہیں، آن فیلڈ امپائرز کے فرائض انجام دیں گے۔
📢 Announcing the match officials for the three-match ODI series between Pakistan and Australia 🏏
Read more: https://t.co/JKxJe2Z4No#PAKvAUS | #BackTheBoysInGreen pic.twitter.com/YFOoE8GYlD
— Pakistan Cricket (@TheRealPCB) May 14, 2026
30 مئی کو راولپنڈی کرکٹ اسٹیڈیم میں ہونے والے پہلے ون ڈے میں کمار دھرماسینا کے ساتھ پاکستان کے آصف یعقوب آن فیلڈ امپائر ہوں گے، جبکہ رچرڈ کیٹلبرو تھرڈ امپائر اور فیصل خان آفریدی فورتھ امپائر کے فرائض انجام دیں گے۔
2 جون کو قذافی اسٹیڈیم لاہور میں ہونے والے دوسرے ون ڈے میں رچرڈ کیٹلبرو اور فیصل خان آفریدی آن فیلڈ امپائرز ہوں گے، جبکہ کمار دھرماسینا تھرڈ امپائر اور آصف یعقوب فورتھ امپائر ہوں گے۔
یہ بھی پڑھیں:پاکستان کرکٹ کی تاریخ کی سب سے بڑی میڈیا ڈیل، پی ایس ایل کے حقوق 26 ارب روپے میں فروخت
4 جون کو اسی مقام پر کھیلے جانے والے تیسرے ون ڈے میں کمار دھرماسینا اور احسن رضا آن فیلڈ امپائرز کی ذمہ داریاں نبھائیں گے، جبکہ رچرڈ کیٹلبرو تھرڈ امپائر اور پاکستان کے ناصر حسین فورتھ امپائر ہوں گے۔
تمام میچز میں گریم لا بروئے میچ ریفری کے طور پر ذمہ داریاں انجام دیں گے۔
