وزیراعظم شہباز شریف نے پاکستان اور چین کے تعلقات کو تاریخی اور مثالی قرار دیتے ہوئے کہا ہے کہ دونوں ممالک ہر موسم کے اسٹریٹجک تعاون پر مبنی شراکت دار ہیں۔ وزیراعظم نے چینی کاروباری وفد سے ملاقات میں دوطرفہ تجارتی اور ڈیجیٹل معیشت کے شعبوں میں تعاون کے فروغ کا خیرمقدم کیا۔
وزیراعظم شہباز شریف نے جمعہ کے روز چینی کاروباری وفد سے ملاقات کے دوران پاکستان اور چین کے درمیان تعلقات کو تاریخی قرار دیتے ہوئے کہا کہ دونوں ممالک ہر موسم کے اسٹریٹجک تعاون پر مبنی شراکت دار ہیں۔
یہ بھی پڑھیے پاک چین اقتصادی تعلقات میں نئی روح: اربوں ڈالرز کے معاہدے اور مشترکہ اکنامک ہیڈ کوارٹر کا قیام
وزیراعظم آفس کی جانب سے جاری بیان کے مطابق 11 رکنی اعلیٰ سطحی چینی کاروباری وفد نے، جس کی قیادت آئی بی آئی بیجنگ یونائیٹڈ ٹیکنالوجی کے بانی، صدر اور کنٹرولنگ شیئر ہولڈر چیان شیاؤ جون کر رہے تھے، وزیراعظم شہباز شریف سے ملاقات کی۔
وزیراعظم نے وفد کا پاکستان آمد پر خیرمقدم کرتے ہوئے کہا کہ پاکستان اور چین کے تعلقات باہمی اعتماد، تعاون اور دوستی کی مضبوط بنیادوں پر قائم ہیں۔ انہوں نے چینی صدر شی جن پنگ کی مدبرانہ قیادت میں چین کی شاندار ترقی کو سراہتے ہوئے کہا کہ وہ رواں ماہ اپنے متوقع دورۂ چین کے منتظر ہیں۔
Islamabad : 15 May 2026.
A high-level 11-member Chinese business delegation led by Mr. Qian Xiaojun, Founder, President & Controlling Shareholder of IBI Beijing United Technology called on Prime Minister Muhammad Shehbaz Sharif at the Prime Minister’s House.
While welcoming… pic.twitter.com/VLlwJYkoDr
— Prime Minister’s Office (@PakPMO) May 15, 2026
بیان کے مطابق وزیراعظم نے دونوں ممالک کے درمیان کاروباری سطح پر بڑھتے ہوئے روابط کو خوش آئند قرار دیا اور کہا کہ آئی بی آئی کی جانب سے ڈیجیٹل معیشت، سرمایہ کاری کے فروغ اور صنعتی تعاون میں دلچسپی انتہائی حوصلہ افزا ہے۔
وزیراعظم نے آئی بی آئی گروپ کی جانب سے پاکستان میں “ڈیجیٹل اکانومی ہیڈکوارٹر” قائم کرنے کے فیصلے کو خوش آئند قرار دیتے ہوئے پاکستان اور چین کے درمیان بڑھتے ہوئے بزنس ٹو بزنس تعاون پر اطمینان کا اظہار کیا۔ انہوں نے کہا کہ یہ امر حوصلہ افزا ہے کہ آئی بی آئی گروپ ڈیجیٹل معیشت، سرمایہ کاری کے فروغ اور صنعتی تعاون کے شعبوں میں شراکت داری کو فروغ دے گا۔
اس موقع پر چیان شیاؤ جون نے پاکستان کی معیشت پر اعتماد کا اظہار کرتے ہوئے کہا کہ آئی بی آئی پاکستان کی معیشت کی ڈیجیٹل تبدیلی کے لیے بنیادی ڈھانچہ فراہم کرنے میں کردار ادا کرنا چاہتی ہے۔
یہ بھی پڑھیے چین کے تجربات سے پاکستان معاشی اور زرعی انقلاب لا سکتا ہے، سی پیک 2.0 کو کامیاب بنائیں گے: وزیراعظم شہباز شریف
انہوں نے بتایا کہ پاکستان میں آئی بی آئی کے ڈیجیٹل اکانومی ہیڈکوارٹر کے قیام سے ملکی معیشت کی ڈیجیٹل ٹرانسفارمیشن کے لیے ایک مرکزی کمانڈ سینٹر قائم ہوگا، جو پاکستانی چھوٹے اور درمیانے درجے کے کاروباری اداروں کے لیے وسیع چینی مارکیٹ تک رسائی کے نئے مواقع پیدا کرے گا۔
چینی وفد کا یہ دورہ وزیراعظم شہباز شریف کے ستمبر 2025 کے دورۂ چین کے دوران بیجنگ میں منعقدہ پاکستان چین بزنس ٹو بزنس انویسٹمنٹ کانفرنس کے بعد سامنے آنے والی پیش رفت کا حصہ قرار دیا جا رہا ہے۔
