جدہ میں گرینڈ حج سمپوزیم کا انعقاد کیا گیا جس میں دنیا بھر سے وزرائے مذہبی امور، حج مشنز کے سربراہان اور اعلیٰ حکام نے شرکت کی۔ پاکستان کی جانب سے وفاقی وزیر مذہبی امور سردار محمد یوسف نے اعلیٰ سطح کے وفد کے ہمراہ سمپوزیم میں شرکت کی جبکہ سیکریٹری مذہبی امور ابرار احمد مرزا اور ڈائریکٹر جنرل حج عبدالوہاب سومرو بھی وفد میں شامل تھے۔
یہ بھی پڑھیں: پاکستان سے حج پروازوں کی روانگی کا آخری دن، 3ہزار 296 عازمینِ سعودی عرب روانہ ہوں گے
سمپوزیم سے خطاب کرتے ہوئے سعودی وزیر حج نے دنیا بھر سے آئے ضیوف الرحمان کا والہانہ خیر مقدم کیا اور کہا کہ حجاج کرام کو بہترین سہولیات کی فراہمی سعودی حکومت کی اولین ترجیح ہے۔ انہوں نے بتایا کہ مقاماتِ مقدسہ میں عازمینِ حج کو شدید موسم سے محفوظ رکھنے کے لیے جدید اور مؤثر انتظامات کیے گئے ہیں۔
گرینڈ حج سمپوزیم میں مقاماتِ مقدسہ کے اندر حجاج کرام کی نقل و حرکت کو مزید بہتر بنانے کے لیے ڈیجیٹل تبدیلیوں اور جدید نظام کا تفصیلی جائزہ لیا گیا۔
اس موقع پر سعودی وزارتِ داخلہ، وزارتِ صحت اور وزارتِ حج کے حکام نے شرکا کو اہم بریفنگ بھی دی۔
سمپوزیم کے دوران عالمی حج دفاتر کے ساتھ ہم آہنگی کو فروغ دینے، قربانی کے گوشت کی تقسیم کے جدید ماڈل اور حجاج کرام کی خدمت کے مختلف پہلوؤں پر تبادلہ خیال کیا گیا۔
مقررین نے اس بات پر زور دیا کہ علم و تحقیق کو ضیوف الرحمان کی خدمت کا بنیادی حصہ بنایا جا رہا ہے تاکہ زائرین کو زیادہ سے زیادہ سہولیات فراہم کی جا سکیں۔
مزید پڑھیے: پاکستان کا حجاج کے لیے تاریخ کا وسیع ترین میڈیکل مشن فعال
مقررین نے کہا کہ گرینڈ حج سمپوزیم کا پچاسواں ایڈیشن حجاج کرام کی دیکھ بھال، جدید سہولیات اور زائرین کی خدمت کے لیے سعودی عرب کے عزم کا مظہر ہے۔
