پاکستان سے حج پروازوں کی روانگی کا عمل آخری مرحلے میں داخل ہو گیا ہے اور آج مختلف شہروں سے فلائٹ آپریشن مکمل کرلیا جائے گا۔ وزارتِ مذہبی امور کے مطابق آج مختلف شہروں سے روانہ ہونے والی 12 خصوصی پروازوں کے ذریعے مزید 3 ہزار 296 عازمینِ حج سعودی عرب روانہ ہوں گے۔
اس سلسلے میں صوبائی دارالحکومت لاہور سے آخری حج پرواز پی کے 741 رات ساڑھے دس بجے 290 عازمین کو لے کر روانہ ہو گی۔
یہ بھی پڑھیں: 1800 سے زیادہ علما عازمین حج کی رہنمائی پر مامور، ڈیجیٹل اور فیلڈ سسٹم بھی فعال
سرکاری اعداد و شمار کے مطابق گزشتہ رات تک 1 لاکھ 14 ہزار 78 پاکستانی عازمینِ حج سرکاری اسکیم کے تحت حجازِ مقدس پہنچ چکے ہیں۔ ان کے علاوہ 44 ہزار 146 پرائیویٹ عازمینِ حج بھی پہلے ہی سعودی عرب میں موجود ہیں اور مناسکِ حج کی تیاریوں میں مصروف ہیں۔ مدینہ منورہ پہنچنے والے زائرین کی مکہ مکرمہ منتقلی کا عمل بھی اب اپنے اختتام کو پہنچ رہا ہے۔
وزارتِ مذہبی امور کے حکام کا کہنا ہے کہ مدینہ منورہ میں موجود آخری 457 عازمین کا قافلہ بھی آج مکہ مکرمہ پہنچ جائے گا، جس کے بعد تمام سرکاری حجاج مکہ مکرمہ میں یکجا ہوجائیں گے۔
عازمینِ حج کی مناسک کی ادائیگی کے بعد وطن واپسی کا شیڈول بھی باقاعدہ طور پر طے کر لیا گیا ہے۔ اس طے شدہ شیڈول کے مطابق جدہ سے حج پروازوں کی واپسی کا باقاعدہ آغاز 31 مئی سے ہوگا۔
یہ بھی پڑھیں: مکہ مکرمہ: ’حرا کلچرل ڈسٹرکٹ‘ میں زائرین اور عازمین حج کا تانتا، تاریخِ اسلام سے آگاہی کے لیے خصوصی دورے
سعودی عرب میں عازمین کو فراہم کی جانے والی سہولیات کی سخت نگرانی کے لیے وزارت کی مانیٹرنگ ٹیمیں مکہ اور مدینہ میں پوری طرح متحرک ہیں۔
ان ٹیموں نے نجی ٹور آپریٹرز کی سہولیات کا جائزہ لینے کے لیے اب تک 4 ہزار 913 پرائیویٹ عازمینِ حج کے انٹرویو مکمل کر لیے ہیں۔ اس مانیٹرنگ کا مقصد یہ یقینی بنانا ہے کہ کسی بھی حاجی کو پیکیج کے برعکس کم سہولیات نہ ملیں۔
دورانِ حج عازمین کی جانب سے حج اخراجات کی زائد وصولی اور طے شدہ سہولیات فراہم نہ کرنے کی شکایات بھی موصول ہوئی ہیں۔ ان شکایات پر وزارتِ مذہبی امور کی ٹیموں نے فوری اور سخت ایکشن لیتے ہوئے نجی کمپنیوں کے خلاف کارروائی کی ہے۔
یہ بھی پڑھیں: پی آئی اے کا قبل از حج آپریشن 2026 شروع، 55 ہزار سے زائد عازمین کے لیے خصوصی پروازیں
اس ایکشن کے نتیجے میں اب تک عازمینِ حج کو 73 ہزار 255 سعودی ریال کی رقم واپس کروائی جاچکی ہے۔
