وزیراعظم شہباز شریف نے عیدالاضحیٰ کے موقع پر عسکری قیادت، اعلیٰ حکومتی و آئینی شخصیات اور مختلف سیاسی رہنماؤں سے ٹیلیفونک رابطے کرکے عید کی مبارکباد دی، جبکہ ملکی سلامتی، استحکام اور خوشحالی کے لیے خصوصی دعائیں بھی کیں۔
وزیراعظم نے چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر، چیف آف دی ایئر اسٹاف ظہیر احمد بابر اور چیف آف دی نیول اسٹاف نوید اشرف کو ٹیلیفون کرکے عید کی مبارکباد پیش کی۔ اس موقع پر انہوں نے مسلح افواج کی پیشہ ورانہ صلاحیتوں، قومی سلامتی کے لیے خدمات اور قربانیوں کو خراجِ تحسین پیش کرتے ہوئے کہا کہ قوم کو اپنے بہادر سپاہیوں اور افواجِ پاکستان کی غیر متزلزل وابستگی پر فخر ہے۔
عیدالاضحیٰ کے بابرکت اور پر مسرت موقع پر میں تمام عزیز اہل وطن اور پوری اُمتِ مسلمہ کو دل کی گہرائیوں سے عید کی مبارکباد پیش کرتا ہوں۔
اللہ تعالیٰ ہمیں اس عظیم مذہبی تہوار کی خوشیوں اور جذبہ ایثار و قربانی کی حقیقی روح سے بہرہ مند فرمائے۔
یہ عید ہمیں عظیم الشان سنت ابراہیمی کی…
— Shehbaz Sharif (@CMShehbaz) May 27, 2026
وزیراعظم نے اُن افسران اور جوانوں کو بھی خصوصی خراجِ عقیدت پیش کیا جو عید کے موقع پر بھی وطنِ عزیز کے دفاع کے لیے اپنے فرائض انجام دے رہے ہیں۔ انہوں نے ملکی سلامتی، ترقی اور خوشحالی کے لیے دعا بھی کی۔
دوسری جانب وزیراعظم نے صدرِ مملکت، گورنرز، وزرائے اعلیٰ، اسپیکر قومی اسمبلی اور مختلف سیاسی جماعتوں کے رہنماؤں سے بھی علیحدہ علیحدہ ٹیلیفونک گفتگو کی اور عیدالاضحیٰ کی مبارکباد دی۔ ان شخصیات میں عبدالعلیم خان، خالد مگسی اور آفتاب شیرپاؤ بھی شامل تھے۔
گفتگو کے دوران ملک کی مجموعی سیاسی صورتحال، وفاق اور صوبوں کے درمیان مؤثر روابط اور باہمی تعاون کی اہمیت پر تبادلۂ خیال کیا گیا۔ وزیراعظم نے اس عزم کا اظہار کیا کہ وفاقی حکومت تمام صوبوں اور اکائیوں کے ساتھ مل کر عوام کو زیادہ سے زیادہ ریلیف فراہم کرنے کے لیے اقدامات جاری رکھے گی۔
وزیراعظم شہباز شریف نے دعا کی کہ اللہ تعالیٰ پاکستان کو امن، ترقی، خوشحالی اور استحکام عطا فرمائے اور قوم کو اتحاد و اتفاق کی دولت سے نوازے۔
