اسلام آباد ٹریفک پولیس نے عیدالاضحیٰ کے تیسرے روز بھی وفاقی دارالحکومت میں ٹریفک کی روانی برقرار رکھنے اور شہریوں کی حفاظت یقینی بنانے کے لیے خصوصی اقدامات جاری رکھے ہوئے ہیں۔ ترجمان اسلام آباد پولیس کے مطابق عید کے پہلے دو روز کے دوران ٹریفک قوانین کی خلاف ورزیوں پر بھرپور کارروائیاں کی گئیں، جبکہ مختلف شاہراہوں اور تفریحی مقامات پر خصوصی دستے تعینات رہے۔
اسلام آباد ٹریفک پولیس کے افسران شہریوں کی سہولت، راہنمائی اور ٹریفک کی روانی کو یقینی بنانے کے لئے شاہراہوں پر موجود۔#WeRIslamabadPolice #Islamabad #ICTP #ITP pic.twitter.com/tgdrHxWBRN
— Islamabad Police (@ICT_Police) May 29, 2026
ترجمان کے مطابق ٹریفک قوانین کی خلاف ورزی پر 2453 گاڑیوں اور موٹرسائیکلوں کے چالان کیے گئے، جبکہ سنگین خلاف ورزیوں پر 836 موٹرسائیکلیں اور 94 گاڑیاں مختلف تھانوں میں بند کی گئیں۔ اس کے علاوہ جان لیوا ٹریفک خلاف ورزیوں پر 31 مقدمات بھی درج کیے گئے۔
یہ بھی پڑھیں:اسلام آباد ٹریفک پولیس کا ’گڈ سٹیزن‘ اسٹیکر کیا ہے؟
اسلام آباد ٹریفک پولیس کا کہنا ہے کہ عید کی تعطیلات کے دوران شہریوں کی بڑی تعداد تفریحی مقامات کا رخ کرتی ہے، جس کے پیش نظر ٹریفک کی روانی برقرار رکھنے اور حادثات سے بچاؤ کے لیے خصوصی پلان ترتیب دیا گیا ہے۔ اہم شاہراہوں پر اضافی نفری تعینات کی گئی جبکہ 15 ہزار سے زائد شہریوں کو ٹریفک قوانین سے متعلق آگاہی بھی فراہم کی گئی۔
چیف ٹریفک آفیسر محمد سرفراز ورک نے شہریوں سے اپیل کی ہے کہ وہ ٹریفک قوانین کی پابندی کریں اور ٹریفک پولیس کے ساتھ تعاون کریں تاکہ عید کے موقع پر شہریوں کی جان و مال کا تحفظ یقینی بنایا جا سکے۔
