بنگلہ دیش کے وزیراعظم طارق رحمان نے عیدالاضحیٰ کے موقع پر ڈھاکہ میں قربانی کے جانوروں کی آلائشیں ٹھکانے لگانے اور صفائی آپریشن کا خود جائزہ لیا۔ انہوں نے مختلف علاقوں کا دورہ کرکے بلدیاتی اداروں کی کارکردگی اور شہر میں صفائی کی صورتحال کا معائنہ کیا۔
یہ بھی پڑھیں:ڈھاکہ یونیورسٹی: وزیراعظم بنگلہ دیش طارق رحمان کی طلبہ سے سیاسی استحکام کے فروغ میں کردار ادا کرنے کی اپیل
بنگلہ دیشی میڈیا کے مطابق وزیراعظم طارق رحمان نے جمعہ کی شام تقریباً چار بجے ڈھاکہ شہر میں صفائی اور آلائشیں تلف کرنے کے انتظامات کا معائنہ شروع کیا۔ ڈپٹی پریس سیکریٹری زاہد الاسلام رونی کے مطابق وزیراعظم نے خود گاڑی چلاتے ہوئے شہر کے مختلف علاقوں کا دورہ کیا تاکہ یہ دیکھا جا سکے کہ عیدالاضحیٰ کے بعد صفائی ستھرائی کا عمل مؤثر انداز میں جاری ہے یا نہیں۔
حکام کے مطابق وزیراعظم نے اپنے دورے کے دوران تمام ٹریفک قوانین کی پابندی کی، ٹریفک سگنلز پر رکے اور عام شہریوں کے ساتھ معمول کے مطابق سفر کیا۔ ان کے اس انداز کو شہری حلقوں میں سراہا گیا۔
وزیراعظم کا قافلہ گلشن ایونیو میں واقع رہائش گاہ سے روانہ ہوا اور گلشن، ہاتیرجھیل، رام پورہ، مالی باغ، کمالاپور، سید آباد، جاتراباڑی، نرندا، گلیستان، شاہ باغ، ڈھاکہ یونیورسٹی، نیو مارکیٹ، کلا باغان، میرپور روڈ، جیگاتلا، مانک میاں ایونیو اور مہاکھالی سمیت متعدد اہم علاقوں سے گزرا۔
وزیراعظم آفس کے مطابق اس دورے کا مقصد اس بات کو یقینی بنانا تھا کہ بلدیاتی ادارے عید کے دوران پیدا ہونے والی آلائشوں اور کچرے کو فوری طور پر صاف کریں تاکہ شہریوں کو صاف ستھرا ماحول فراہم کیا جا سکے۔
یہ بھی پڑھیں:ہماری جماعت کے خلاف سازشیں ہورہی ہیں، بنگلہ دیشی وزیراعظم طارق رحمان کا اظہار تشویش
واضح رہے کہ عیدالاضحیٰ کے موقع پر ڈھاکہ میں لاکھوں جانور قربان کیے جاتے ہیں جس کے باعث بڑی مقدار میں نامیاتی فضلہ پیدا ہوتا ہے۔ اسی وجہ سے ہر سال بلدیاتی ادارے بڑے پیمانے پر صفائی آپریشن کرتے ہیں تاکہ صحتِ عامہ اور ماحولیات کو محفوظ رکھا جا سکے۔
