شہر میں موسلادھار بارش اور ژالہ باری کے باعث بجلی کا ترسیلی نظام بری طرح متاثر ہوگیا، جس کے نتیجے میں 100 سے زائد فیڈر ٹرپ کر گئے اور مختلف علاقے عارضی طور پر بجلی سے محروم ہوگئے۔
یہ بھی پڑھیں:ملک بھر میں شدید گرمی برقرار، مختلف علاقوں میں بارش اور ژالہ باری کی پیشگوئی
شہر کے مختلف علاقوں گلبرگ، گڑھی شاہو، ایبٹ روڈ، ریگل چوک، لکشمی چوک، مسلم ٹاؤن، ماڈل ٹاؤن اور مال روڈ سمیت کئی مقامات پر تیز بارش ریکارڈ کی گئی۔ اسی طرح دھرم پورہ، صحافی کالونی، جیل روڈ، کلمہ چوک، مانگ منڈی اور فیروز پور روڈ کے اطراف میں بھی بارش اور ژالہ باری نے معمولات زندگی متاثر کر دیے۔
🛑لاہور شہر میں شدید⚡ بارش، اب تک 70 ملی میٹر ریکارڈ! pic.twitter.com/wWFIwLozVN
— WeatherWalay (@weatherwalay) May 30, 2026
میڈیا رپورٹس کے مطابق بارش اور ژالہ باری کے باعث لاہور الیکٹرک سپلائی کمپنی (لیسکو) کا بجلی کا نظام شدید دباؤ کا شکار ہوگیا، جس کے نتیجے میں مجموعی طور پر 100 سے زائد فیڈرز ٹرپ کر گئے اور کئی علاقوں میں بجلی کی فراہمی معطل ہوگئی۔
دوسری جانب لیسکو حکام کا کہنا ہے کہ صورتحال کو مانیٹر کیا جا رہا ہے اور بارش کے تھمنے کے بعد متاثرہ فیڈرز کی بحالی کا کام فوری طور پر شروع کیا جائے گا۔
ادھر شہریوں کو بجلی کی بندش اور خراب موسم کے باعث مشکلات کا سامنا کرنا پڑ رہا ہے، جبکہ متعدد علاقوں میں سڑکوں پر پانی جمع ہونے سے ٹریفک کی روانی بھی متاثر ہوئی ہے۔
محکمہ موسمیات کے مطابق آئندہ چند گھنٹوں تک مزید بارش کا امکان موجود ہے، جس سے صورتحال مزید پیچیدہ ہو سکتی ہے۔
