ملک کے بیشتر علاقوں میں شدید گرمی کی لہر برقرار ہے، تاہم محکمہ موسمیات نے مختلف شہروں میں بارش، تیز ہواؤں اور بعض مقامات پر ژالہ باری کی پیشگوئی بھی کی ہے۔
محکمہ موسمیات کے مطابق پنجاب کے بیشتر اضلاع میں موسم شدید گرم رہے گا۔
تاہم لاہور، حافظ آباد، شیخوپورہ، گوجرانوالہ، گجرات، سیالکوٹ، نارووال اور گردونواح میں چند مقامات پر بارش کا امکان ہے۔
یہ بھی پڑھیں: عید الاضحیٰ پر شدید گرمی کا امکان: محکمہ موسمیات نے 25 سے 31 مئی تک ملک گیر ہیٹ ویو کی پیشگوئی کردی
اسلام آباد اور گردونواح میں دن کے اوقات میں شدید گرمی متوقع ہے جبکہ رات کے وقت مختلف علاقوں میں تیز ہواؤں اور گرج چمک کے ساتھ بارش ہو سکتی ہے۔
خیبرپختونخوا کے زیریں اضلاع میں شدید گرمی برقرار رہے گی، تاہم چترال، دیر، سوات، ایبٹ آباد، کوہاٹ، پشاور اور مالاکنڈ کے بعض علاقوں میں بارش کا امکان ظاہر کیا گیا ہے۔
محکمہ موسمیات نے بعض مقامات پر تیز ہواؤں اور ژالہ باری کی بھی پیشگوئی کی ہے۔
دوسری جانب سندھ اور بلوچستان کے بیشتر اضلاع میں موسم گرم اور خشک رہنے کا امکان ہے۔
مزید پڑھیں: عید کے موقع پر پاکستان میں موسم کیسا رہے گا اور اس موسم میں گوشت کیسے کھایا جائے؟
کراچی کے حوالے سے محکمہ موسمیات کا کہنا ہے کہ آئندہ 24 گھنٹوں کے دوران شہر کا موسم گرم اور مرطوب رہے گا۔
گزشتہ 24 گھنٹوں کے دوران شہر کا کم سے کم درجہ حرارت 30 ڈگری سینٹی گریڈ ریکارڈ کیا گیا جبکہ آج زیادہ سے زیادہ درجہ حرارت 35 سے 37 ڈگری سینٹی گریڈ تک جانے کا امکان ہے۔
محکمہ موسمیات کے مطابق صبح کے وقت ہوا میں نمی کا تناسب 75 فیصد ریکارڈ کیا گیا۔
