بھارت کی نامور پلے بیک گلوکارہ سمن کلیان پور 89 برس کی عمر میں انتقال کر گئیں۔ وہ گزشتہ ایک ماہ سے علیل تھیں اور اتوار کی شب ممبئی میں اپنی رہائش گاہ پر انتقال کر گئیں۔
خاندانی ذرائع اور قریبی دوستوں کے مطابق سمن کلیان پور کا انتقال لوکھنڈوالا میں واقع گھر میں تقریباً رات 8 بجے ہوا۔ بتایا گیا ہے کہ اپنے آخری ایام میں وہ اکثر اپنے ہی گائے ہوئے مشہور گیت سنتی رہیں۔
یہ بھی پڑھیں: نوجوان پنجابی گلوکارہ کا لرزہ خیز قتل، لاش نہر سے برآمد
سمن کلیان پور نے 1960 اور 1970 کی دہائی میں بھارتی فلمی صنعت میں نمایاں مقام حاصل کیا۔ وہ اپنے دور کی صفِ اول کی گلوکاراؤں میں شمار کی جاتی تھیں۔
ان کے مشہور گانوں میں ’آج کل تیرے میرے پیار کے چرچے‘ (برہماچاری، 1968)، ’نا نا کرتے پیار‘ (جب جب پھول کھلے، 1965) اور ’تم نے پکارا اور ہم چلے آئے‘ (راجکمار، 1964) شامل ہیں جو آج بھی موسیقی کے شائقین میں مقبول ہیں۔
یہ بھی پڑھیں: معروف گلوکارہ ڈولی پارٹن کو خطرناک بیماری کی تشخیص، شوز منسوخ کرنے کا اعلان
اپنے فنی کیریئر کے دوران انہوں نے 11 مختلف زبانوں میں مجموعی طور پر 740 گیت ریکارڈ کیے۔ ان میں 140 دوگانے بھارتی لیجنڈ محمد رفیع کے ساتھ بھی شامل ہیں۔ فلمی نغموں کے علاوہ انہوں نے بھجن، غزل اور ٹھمری جیسے کلاسیکی اصناف میں بھی اپنی آواز کا جادو جگایا۔
ان کی آواز کو اکثر لتا منگیشکر کی آواز سے مشابہ قرار دیا جاتا تھا تاہم سمن کلیان پور نے ہمیشہ اس تقابل کو مسترد کیا اور لتا منگیشکر کو اپنی قریبی دوست قرار دیا۔
یہ بھی پڑھیں: معروف گلوکارہ و اداکارہ دل کا دورہ پڑنے سے انتقال کر گئیں
2022 میں ایک انٹرویو میں انہوں نے کہا تھا کہ لتا منگیشکر کے ساتھ ان کا تعلق احترام اور محبت پر مبنی تھا اور ان سے ہر ملاقات ایک خوشگوار تجربہ ہوتا تھا۔
ان کی وفات پر بھارتی وزیراعظم نریندر مودی سمیت مختلف سیاسی و ثقافتی شخصیات نے گہرے دکھ اور افسوس کا اظہار کیا ہے۔ وزیراعظم نے کہا کہ سمن کلیان پور کی سریلی آواز نے بھارتی موسیقی کی دنیا کو مالا مال کیا اور وہ ہمیشہ مداحوں کے دلوں میں زندہ رہیں گی۔
مرحومہ کی آخری رسومات آج ممبئی میں ادا کی جائیں گی۔
