سیکیورٹی فورسز نے خیبر پختونخوا کے مختلف علاقوں میں انٹیلیجنس اطلاعات کی بنیاد پر کارروائیاں کرتے ہوئے بھارتی سرپرستی میں سرگرم فتنہ الخوارج کے 4 دہشتگردوں کو ہلاک کر دیا۔
پاک فوج کے شعبہ تعلقات عامہ (آئی ایس پی آر) کے مطابق یہ آپریشنز 3 اور 4 جون کی درمیانی شب انجام دیے گئے۔
آئی ایس پی آر کے مطابق پہلی کارروائی ڈیرہ اسماعیل خان میں خوارج کی موجودگی کی مصدقہ اطلاع پر کی گئی۔
سیکیورٹی فورسز نے دہشتگردوں کے ٹھکانے کو مؤثر انداز میں نشانہ بنایا، جس کے نتیجے میں شدید فائرنگ کا تبادلہ ہوا، اور کارروائی کے دوران فتنہ الخوارج کے 2 دہشتگرد مارے گئے۔
دوسرا انٹیلیجنس بیسڈ آپریشن ضلع مہمند میں کیا گیا، جہاں سیکیورٹی فورسز نے مزید 2 خوارج کو ہلاک کر دیا۔ ہلاک ہونے والے دہشتگردوں کے قبضے سے اسلحہ اور گولہ بارود بھی برآمد کیا گیا۔
آئی ایس پی آر کے مطابق ہلاک کیے گئے دہشتگرد علاقے میں دہشتگردی کی مختلف کارروائیوں میں ملوث رہے تھے۔ فورسز کی جانب سے علاقے میں کلیئرنس آپریشن بھی جاری ہے تاکہ موجود کسی بھی دوسرے خارجی کو تلاش کرکے ختم کیا جا سکے۔
پاک فوج کے شعبہ تعلقات عامہ نے اپنے بیان میں کہاکہ غیر ملکی سرپرستی اور حمایت یافتہ دہشت گردی کے ناسور کے مکمل خاتمے تک انسداد دہشت گردی کی کارروائیاں بلا تعطل جاری رکھی جائیں گی۔
