ممبر نیشنل پریس کلب اور ممتاز نیوز ویب سائٹ ’وی نیوز‘ سے وابستہ سینیئر صحافی، کالم نگار عبید اللہ عابد کے جواں سال فرزند ’انس عبید‘ طویل علالت کے بعد خالقِ حقیقی سے جا ملے۔
مرحوم کی نمازِ جنازہ جمعرات کی رات 10 بجے کیانی روڈ، نزد غزالی کالج، بارہ کہو میں ادا کی گئی، جس کے بعد انہیں مقامی قبرستان میں نم آنکھوں اور سسکتے دلوں کے ساتھ سپردِ خاک کر دیا گیا۔
نمازِ جنازہ میں صحافی برادری اور شہریوں کی بڑی تعداد میں شرکت
جواں سال انس عبید کی نمازِ جنازہ میں ’وی نیوز‘ کے تمام اسٹاف، نیشنل پریس کلب کے عہدیداران، جڑواں شہروں (راولپنڈی اور اسلام آباد) کے سینیئر صحافیوں، اینکرز، کالم نگاروں اور زندگی کے مختلف شعبوں سے تعلق رکھنے والے افراد اور علاقہ مکینوں کی ایک بڑی تعداد نے شرکت کی۔
صحافتی تنظیموں اور ساتھیوں کا اظہارِ تعزیت اور دعائے مغفرت
نمازِ جنازہ کی ادائیگی اور تدفین کے بعد میڈیا برادری نے سینیئر صحافی عبید اللہ عابد سے ان کے لختِ جگر کی ناگہانی وفات پر دلی تعزیت اور گہرے دکھ کا اظہار کیا۔
تمام شرکا نے سوگوار خاندان کے لیے اس عظیم اور ناقابلِ تلافی صدمے پر صبرِ جمیل کی دعا کی اور مرحوم انس عبید کے درجات کی بلندی کے لیے دستِ دعا بلند کرتے ہوئے دعا کی کہ اللہ تعالیٰ مرحوم کو اپنے جوارِ رحمت میں جگہ دے اور جنت الفردوس میں اعلیٰ مقام عطا فرمائے۔
