گرمیوں کے مہینوں میں شدید اور طویل گرمی کے باعث جسم میں پانی کی سطح تیزی سے کم ہو جاتی ہے، جس کی وجہ سے اکثر لوگ ڈی ہائیڈریشن (پانی کی کمی) کا شکار ہوجاتے ہیں۔
اس صورتحال سے نمٹنے کے لیے ماہرینِ صحت نے بازار کے ڈبہ بند جوسز اور کاربونیٹڈ مشروبات (کولڈ ڈرنکس) کے بجائے الیکٹرولائٹ سے بھرپور قدرتی مشروبات کو ایک صحت بخش اور بہترین آپشن قرار دیا ہے۔
گرمی کی شدت کا مقابلہ کرنے اور جسم میں نمکیات کی کمی کو پورا کرنے کے لیے درج ذیل 7 مشروبات انتہائی مفید ثابت ہو سکتے ہیں:
ناریل کا پانی
الیکٹرولائٹس سے بھرپور ایک قدرتی اور فرحت بخش مشروب ہے۔ اس کے صرف ایک کپ میں تقریباً 600 ملی گرام پوٹاشیم، 60 ملی گرام میگنیشیم اور 252 ملی گرام سوڈیم پایا جاتا ہے۔ اس میں کیلوریز کی مقدار بہت کم ہوتی ہے جو گرم موسم میں جسم کو مؤثر طریقے سے ہائیڈریٹ رکھتا ہے۔
تربوز کا جوس
تربوز میں پوٹاشیم، میگنیشیم اور وٹامن سی وافر مقدار میں پائے جاتے ہیں۔ یہ غذائی اجزا نہ صرف الیکٹرولائٹس کی کمی کو پورا کرتے ہیں بلکہ ایسے اینٹی آکسیڈنٹس بھی فراہم کرتے ہیں جو فری ریڈیکلز کا مقابلہ کرنے میں مدد دیتے ہیں۔ گرمیوں میں تازہ تربوز کا جوس ایک بہترین ہائیڈریٹنگ مشروب ہے۔
لیموں کا شربت
لیموں کا شربت ہمیشہ سے گرمیوں کا ایک کلاسک اور ہر دلعزیز مشروب رہا ہے۔ تازہ لیموں کے رس کو پانی میں ملا کر اس میں ایک چٹکی سمندری نمک شامل کرنے سے الیکٹرولائٹ کی مقدار بڑھ جاتی ہے جو جسم کو پانی کی کمی سے بچاتی ہے۔
گھر کا بنا اسپورٹس ڈرنک
بازار کے ریڈی میڈ اسپورٹس ڈرنکس کے بجائے گھر پر ہی ایک صحت بخش مشروب تیار کیا جا سکتا ہے۔ اس کے لیے پانی میں تازہ مالٹے کا رس، ایک چٹکی سمندری نمک اور ایک چمچ شہد یا ایگیو سیرپ اچھی طرح مکس کرلیں۔
یہ الیکٹرولائٹس کا قدرتی ذریعہ ہے جس میں بازار کے مشروبات کے مقابلے میں چینی انتہائی کم ہوتی ہے۔
کھیرے اور پودینے کا پانی
کھیرے میں پوٹاشیم اور میگنیشیم سمیت کئی اہم غذائی اجزاء پائے جاتے ہیں، جبکہ پودینہ اس میں ایک بہترین اور فرحت بخش ذائقہ شامل کرتا ہے۔ یہ ہائیڈریٹنگ ڈرنک گرمیوں کے تپتے دنوں میں آپ کو تروتازہ رکھنے میں مددگار ثابت ہوتا ہے۔
ایلوویرا کا جوس
ایلوویرا (گوارپٹھا) کا جوس وٹامنز، منرلز اور امینو ایسڈز سے بھرپور ہوتا ہے۔ یہ جسم میں پانی کی سطح برقرار رکھنے کے ساتھ ساتھ نظامِ ہضم کی صحت کے لیے بھی مفید ہے۔ ماہرین کے مطابق بغیر کسی اضافی چینی یا مصنوعی ذائقوں کے خالص ایلوویرا جوس کا استعمال زیادہ فائدہ مند ہوتا ہے۔
ہربل ٹی
الیکٹرولائٹ سے بھرپور جڑی بوٹیوں سے تیار کردہ ہربل ٹی روایتی سمر ڈرنکس کا ایک بہترین اور فرحت بخش متبادل ثابت ہوسکتی ہے، جو جسم میں سیال مادوں کا توازن برقرار رکھنے میں بھرپور مدد فراہم کرتی ہے۔
