ضلعی انتظامیہ اسلام آباد نے جاری کفایت شعاری اقدامات کے پیشِ نظر وفاقی دارالحکومت میں مارکیٹوں، شاپنگ مالز، ریسٹورنٹس اور دیگر تجارتی مراکز کے لیے نئے اوقاتِ کار کا اعلان کر دیا ہے۔
ڈسٹرکٹ مجسٹریٹ اسلام آباد کی جانب سے جاری کردہ نوٹیفکیشن کے مطابق یہ نئے اوقات 10 جون 2026 سے نافذ العمل ہو گئے ہیں اور اگلے احکامات تک برقرار رہیں گے۔
مارکیٹیں، بازار اور شاپنگ مالز رات 9 بجے بند کرنے کی ہدایت
نوٹیفکیشن کے تحت تمام دکانیں، مارکیٹیں، شاپنگ مالز اور بازار ہفتے کے ساتوں دن بشمول ہفتہ اور اتوار رات 9:00 بجے بند کرنے ہوں گے۔
یہ بھی پڑھیں:بازاروں کے اوقات کار میں کمی پر غور، شادی ہال اور ریستوران بھی جلد بند کروانے کا فیصلہ
اسی طرح ڈیپارٹمنٹل اسٹورز، الگ قائم کریانہ اور گروسری اسٹورز، شادی ہالز، مارکیز اور دیگر تقریباتی مقامات کو رات 10:00 بجے تک کاروبار جاری رکھنے کی اجازت ہوگی۔
ریسٹورنٹس، کیفے اور فوڈ آؤٹ لیٹس رات 11 بجے تک کھلے رہ سکیں گے
ریسٹورنٹس، کیفے، کھانے پینے کے مراکز، فوڈ آؤٹ لیٹس اور پھل و سبزیوں کی الگ دکانیں رات 11:00 بجے تک کھلی رہ سکیں گی۔ تاہم ٹیک اوے اور ہوم ڈیلیوری سروسز کو ان پابندیوں سے مستثنیٰ قرار دیا گیا ہے۔
اسپتالوں، فارمیسیوں اور طبی سہولیات کو مکمل استثنیٰ حاصل
نوٹیفکیشن میں متعدد ضروری خدمات کو نئے اوقاتِ کار سے مکمل استثنیٰ دیا گیا ہے۔ ان میں اسپتال، کلینکس، میڈیکل لیبارٹریز، فارمیسیاں، میڈیکل سپلائی اسٹورز، بیکریاں، تنور، دودھ اور ڈیری شاپس، پیٹرول اور سی این جی اسٹیشنز، الیکٹرک گاڑیوں کے چارجنگ اسٹیشنز، جم، کھیلوں کی سہولیات، پیڈل کورٹس، آئی ٹی کمپنیاں اور کال سینٹرز شامل ہیں۔
ضلعی انتظامیہ کے مطابق یہ اقدام 3 جون 2026 کو جاری کیے گئے سابقہ نوٹیفکیشن کے تسلسل میں کیا گیا ہے اور اس کا مقصد توانائی کے مؤثر استعمال اور حکومتی کفایتی پالیسی پر عمل درآمد کو یقینی بنانا ہے۔
یہ بھی پڑھیں:کفایت شعاری اقدامات پر سختی سے عملدرآمد کیا جائے، اسحاق ڈار کی ہدایت
اس حوالے سے نوٹیفکیشن کی نقول چیف کمشنر اسلام آباد، اسلام آباد پولیس، کیپیٹل ڈویلپمنٹ اتھارٹی (سی ڈی اے)، وزارتِ داخلہ، پیمرا اور اسلام آباد چیمبر آف کامرس اینڈ انڈسٹری (آئی سی سی آئی) سمیت متعلقہ اداروں کو ارسال کر دی گئی ہیں تاکہ اس پر مؤثر عمل درآمد اور عوامی آگاہی کو یقینی بنایا جا سکے۔
ضلعی انتظامیہ نے تمام تاجروں اور کاروباری افراد کو ہدایت کی ہے کہ وہ مقررہ اوقاتِ کار کی پابندی کریں، جبکہ واضح کیا گیا ہے کہ یہ احکامات اگلے نوٹیفکیشن تک نافذ العمل رہیں گے۔
