واٹس ایپ اینڈرائیڈ صارفین کے لیے ایک نیا اور جاندار فیچر متعارف کرانے جا رہا ہے جس کے تحت اب میسجز کو مینیج کرنے کا انٹرفیس بالکل آئی فون جیسا صاف ستھرا اور جدید ہو جائے گا۔ اس نئی تبدیلی کے بعد اب اینڈرائیڈ صارفین کو چیٹ کے دوران میسجز کا جواب دینے، انہیں فارورڈ کرنے یا کاپی کرنے میں پہلے سے زیادہ آسانی ہوگی۔
یہ بھی پڑھیں: یورپی یونین کا میٹا کو حریف اے آئی چیٹ بوٹس کے لیے واٹس ایپ کھولنے کا حکم
یہ نیا ڈیزائن واٹس ایپ کے پرانے روایتی مینیو کی جگہ لے گا، جس میں اب جیسے ہی کوئی صارف کسی میسج پر معمول کے مطابق لانگ پریس کرے گا تو ایک مختصر اور کامپیکٹ مینیو پینل اسکرین کے اوپر جانے کے بجائے بالکل اسی میسج کے برابر میں نمودار ہو جائے گا۔
اس سے قبل اینڈرائیڈ صارفین کو کسی میسج کو فارورڈ، کاپی یا ڈیلیٹ کرنے کے لیے اسکرین کے سب سے اوپر بنے آپشنز کا سہارا لینا پڑتا تھا یا پھر کچھ فیچرز کو مینیو کے اندر جا کر ڈھونڈنا پڑتا تھا، لیکن یہ نئی ڈیزائننگ تمام اہم ٹولز کو ایک ہی جگہ مرکزی حیثیت دے کر اس الجھن کو ختم کر دے گی۔
اس مینیو میں زیادہ استعمال ہونے والے آپشنز سامنے ہوں گے جبکہ کم استعمال ہونے والے فیچرز کو ایک الگ ’more‘ سیکشن میں رکھ دیا گیا ہے تاکہ اسکرین پر زیادہ رش محسوس نہ ہو۔
یہ بھی پڑھیں: میٹا نے واٹس ایپ، فیس بک اور انسٹاگرام کے بامعاوضہ فیچرز متعارف کرا دیے
اس معمولی لیکن اہم اپ ڈیٹ کا مقصد اینڈرائیڈ اور آئی فون دونوں ڈیوائسز پر واٹس ایپ کے تجربے کو یکساں بنانا ہے۔
واٹس ایپ کا یہ نیا فیچر فی الحال اینڈرائیڈ کے بیٹا ورژن 2.26.23.8 پر دیکھا گیا ہے اور امید کی جا رہی ہے کہ بیٹا ٹیسٹنگ کے بعد اسے بہت جلد دنیا بھر کے تمام اینڈرائیڈ صارفین کے لیے باقاعدہ طور پر رول آؤٹ کردیا جائے گا۔
