وزیراعظم شہباز شریف نے گلگت بلتستان کے انتخابات کے حوالے سے اہم بیان دیتے ہوئے کہا ہے کہ پاکستان پیپلز پارٹی گلگت بلتستان میں اکثریتی جماعت بن کر سامنے آئی ہے، اس لیے انہیں حکومت بنانے کی دعوت دیتے ہیں۔
اپنے ایک بیان میں وزیراعظم نے کہاکہ مسلم لیگ (ن) گلگت بلتستان میں حکومت سازی کے معاملے پر پاکستان پیپلز پارٹی کی مکمل حمایت کرتی ہے۔
وزیر اعظم شہباز شریف نے پیپلز پارٹی کو گلگت میں حکومت بنانے کی دعوت دے دی۔
— Muhammad Zareef (@muhammadzareef_) June 12, 2026
انہوں نے واضح کیاکہ مسلم لیگ (ن) نے گلگت بلتستان اسمبلی میں اپوزیشن میں بیٹھنے کا فیصلہ کیا ہے، تاہم پارٹی کے منتخب اراکین پیپلز پارٹی کو حکومت بنانے کے لیے ووٹ دیں گے۔
شہباز شریف کا کہنا تھا کہ یہ فیصلہ جمہوری روایات اور اقدار کو مقدم رکھتے ہوئے کیا گیا ہے۔
انہوں نے کہاکہ مسلم لیگ (ن) نے ہمیشہ اپنی حلیف جماعتوں کے ساتھ عزت و احترام کے رشتے کو برقرار رکھا ہے اور آئندہ بھی اتحادی سیاست کے تقاضوں کو اسی جذبے کے ساتھ نبھایا جائے گا۔
واضح رہے کہ گلگت بلتستان میں پیپلز پارٹی اکثریتی جماعت بن کر سامنے آئی ہے، جبکہ مسلم لیگ ن کا دوسرا نمبر ہے۔
مسلم لیگ ن گلگت بلتستان کی قیادت یہ چاہتی تھی کہ آزاد امیدواروں کو ساتھ ملا کر حکومت بنائی جائے، لیکن مرکزی قیادت نے یہ فیصلہ کیا ہے کہ وہاں پیپلز پارٹی کو حکومت بنانے دی جائے۔
