فیفا فٹبال ورلڈکپ 2026 کے تیسرے میزبان ملک امریکا میں بھی عالمی فٹبال میلے کی شاندار افتتاحی تقریب منعقد کی گئی، جہاں موسیقی، روشنیوں اور جوش و خروش سے بھرپور ماحول نے شائقین کو مسحور کر دیا۔
یہ بھی پڑھیں:لاس اینجلس میں ورلڈ کپ کا جوش عروج پر، مہنگے ٹکٹ اور سفری پابندیاں بھی شائقین کا جذبہ کم نہ کر سکیں
لاس اینجلس کے اسٹیڈیم میں میزبان امریکا اور پیراگوئے کے درمیان میچ سے قبل ہونے والی تقریب میں معروف میوزیکل بینڈز نے دلکش پرفارمنسز پیش کیں۔ رنگا رنگ شو، موسیقی اور خصوصی اسٹیج پرفارمنسز نے اسٹیڈیم میں موجود ہزاروں تماشائیوں کو جھومنے پر مجبور کر دیا۔
افتتاحی تقریب کے دوران فٹبال کے عالمی میلے کا جشن بھرپور انداز میں منایا گیا، جبکہ شائقین نے اپنے پسندیدہ ممالک کے جھنڈے لہرا کر ایونٹ کے آغاز کا خیرمقدم کیا۔
اس سے قبل ورلڈکپ کے دوسرے میزبان ملک کینیڈا میں بھی افتتاحی تقریب منعقد ہوئی تھی، جس کے بعد کینیڈا اور بوسنیا کے درمیان کھیلا گیا میچ ایک، ایک گول سے برابر رہا تھا۔
ورلڈکپ 2026 کا باقاعدہ آغاز سب سے پہلے میکسیکو میں ہونے والی شاندار افتتاحی تقریب سے ہوا تھا، جہاں عالمی شہرت یافتہ گلوکارہ شکیرا اور بورنا بوائے کی دھواں دار پرفارمنسز نے دنیا بھر کے فٹبال شائقین کی توجہ حاصل کی تھی۔
یہ بھی پڑھیں:فیفا ورلڈ کپ 2026: کن اسٹیڈیمز میں کتنے شائقین کی گنجائش موجود ہے؟
تینوں میزبان ممالک میں منعقد ہونے والی تقریبات نے ورلڈکپ 2026 کو ایک یادگار آغاز فراہم کیا ہے، جبکہ شائقین اب اگلے مرحلوں میں سنسنی خیز مقابلوں کے منتظر ہیں۔
