فیفا ورلڈ کپ 2026 تین ممالک، امریکا، کینیڈا اور میکسیکو میں منعقد ہوگا، جہاں 16 مختلف شہروں کے اسٹیڈیمز اس عالمی فٹبال میلے کی میزبانی کریں گے۔
ہزاروں شائقین کی گنجائش رکھنے والے یہ میدان تاریخ کے سب سے بڑے ورلڈ کپ کی میزبانی کے لیے تیار ہیں۔
فیفا کے مطابق ٹورنامنٹ کے آغاز سے قبل ہی دنیا بھر سے غیر معمولی دلچسپی اور ٹکٹوں کی بے مثال طلب سامنے آئی۔
عالمی فٹبال تنظیم کا کہنا ہے کہ 1994 کے ورلڈ کپ میں قائم ہونے والا 35 لاکھ تماشائیوں کی حاضری کا ریکارڈ اب ٹوٹنے کے قریب ہے، جو پہلی مرتبہ 48 ٹیموں پر مشتمل ورلڈ کپ کے حجم اور اس کی بڑھتی ہوئی مقبولیت کی عکاسی کرتا ہے۔
فیفا کی جانب سے جاری کردہ فہرست کے مطابق مختلف میزبان اسٹیڈیمز کی گنجائش درج ذیل ہے:
• اٹلانٹا اسٹیڈیم 68 ہزار 239 نشستیں
• بی سی پلیس، وینکوور 52 ہزار 497 نشستیں
• بوسٹن اسٹیڈیم 64 ہزار 146 نشستیں
• ڈلاس اسٹیڈیم 70 ہزار 649 نشستیں
• گواڈا لاہارا اسٹیڈیم 45 ہزار 664 نشستیں
• ہیوسٹن اسٹیڈیم 68 ہزار 777 نشستیں
• کنساس سٹی اسٹیڈیم 69 ہزار 45 نشستیں
• لاس اینجلس اسٹیڈیم 70 ہزار 492 نشستیں
• میکسیکو سٹی اسٹیڈیم 80 ہزار 824 نشستیں
• میامی اسٹیڈیم 64 ہزار 478 نشستیں
• مونتری اسٹیڈیم 51 ہزار 243 نشستیں
• نیویارک، نیو جرسی اسٹیڈیم 80 ہزار 663 نشستیں
• فلاڈیلفیا اسٹیڈیم 68 ہزار 324 نشستیں
• سان فرانسسکو بے ایریا اسٹیڈیم 68 ہزار 827 نشستیں
• سیئٹل اسٹیڈیم 66 ہزار 925 نشستیں
• ٹورنٹو اسٹیڈیم 43 ہزار 36 نشستیں۔
فیفا کا کہنا ہے کہ 3 ممالک میں منعقد ہونے والا یہ میگا ایونٹ نہ صرف تاریخ کا پہلا 48 ٹیموں کا ورلڈ کپ ہوگا بلکہ شائقین کی شرکت کے اعتبار سے بھی ایک نیا عالمی ریکارڈ قائم کر سکتا ہے۔
فٹبال ورلڈ کپ کا آغاز 1930 میں یوراگوئے سے ہوا تھا۔ دوسری جنگِ عظیم کے باعث ایک طویل وقفے کے باوجود یہ مقابلہ دنیا کا سب سے بڑا کھیلوں کا ایونٹ بن چکا ہے۔ قریباً ایک صدی پر محیط تاریخ میں صرف چند ممالک ہی عالمی تاج اپنے سر سجا سکے ہیں۔
برازیل 5 مرتبہ عالمی چیمپیئن بن کر سب سے کامیاب ٹیم ہے۔ جرمنی اور اٹلی 4، ارجنٹائن 3، جبکہ یوراگوئے، فرانس، انگلینڈ اور اسپین ایک ایک سے زائد مرتبہ عالمی اعزاز حاصل کر چکے ہیں۔ 2022 کے قطر ورلڈ کپ میں ارجنٹائن نے فرانس کو شکست دے کر تیسری مرتبہ عالمی تاج اپنے سر سجایا تھا اور اب وہ دفاعی چیمپیئن کی حیثیت سے اپنے اعزاز کا دفاع کرے گا۔
