چیئرمین سینیٹ سید یوسف رضا گیلانی کی قیادت میں سینیٹ سیکرٹریٹ نے ڈیجیٹل تبدیلی کی جانب ایک بڑا قدم اٹھاتے ہوئے اراکینِ سینیٹ کے لیے ایک جامع موبائل ایپلیکیشن متعارف کرانے کا فیصلہ کیا ہے۔
اس حوالے سے چیئرمین سینیٹ کا کہنا ہے کہ جدید ٹیکنالوجی کے استعمال سے پارلیمانی نظام کو نہ صرف مؤثر اور ماحول دوست بنایا جارہا ہے، بلکہ انتظامی استعداد، شفافیت اور بروقت معلومات تک رسائی کے لیے ڈیجیٹلائزیشن اب ناگزیر ہو چکی ہے. سینیٹ سیکرٹریٹ نے یہ موبائل ایپ کسی بیرونی مدد کے بغیر، مکمل طور پر اپنے وسائل اور تکنیکی مہارت کو بروئے کار لاتے ہوئے خود تیار کی ہے۔
یہ بھی پڑھیں: پائیدار ترقی کے لیے مضبوط ادارے اور شفاف نظام ناگزیر ہے، چیئرمین سینیٹ یوسف رضا گیلانی
سید یوسف رضا گیلانی نے ایپ کی خصوصیات پر روشنی ڈالتے ہوئے بتایا کہ یہ موبائل ایپلیکیشن سینیٹرز کو پارلیمانی امور تک محفوظ اور فوری رسائی فراہم کرے گی، جس سے سینیٹ اجلاس، قانون سازی، قائمہ کمیٹیوں اور سرکاری دستاویزات تک آسان رسائی ممکن ہو سکے گی۔
انہوں نے اس اقدام کو ای-آفس نظام کے فروغ کے لیے ایک اہم سنگِ میل قرار دیتے ہوئے کہا کہ اس ڈیجیٹل نظام کی بدولت کاغذ کے استعمال اور انتظامی تاخیر میں نمایاں کمی آئے گی. اس ایپلیکیشن کی تیاری میں سیکیورٹی، استعمال میں آسانی اور مؤثر رسائی کو خصوصی طور پر ترجیح دی گئی ہے تاکہ اراکین کو کام کے دوران کسی قسم کی دشواری کا سامنا نہ کرنا پڑے۔
یہ بھی پڑھیں: سینیٹ کی کفایت شعاری مہم: 500 فیصد زائد بچت، 1.43 ارب روپے قومی خزانے میں جمع
چیئرمین سینیٹ نے اس شاندار پیش رفت پر تکنیکی ٹیم اور متعلقہ افسران کی کاوشوں کو سراہتے ہوئے واضح کیا کہ سینیٹ سیکرٹریٹ کو جدید تقاضوں سے ہم آہنگ کرنے کے لیے ادارہ جاتی اصلاحات کا سلسلہ مستقبل میں بھی جاری رکھا جائے گا۔
اس سلسلے میں سینیٹ موبائل ایپ کی باقاعدہ افتتاحی تقریب مستقبل قریب میں منعقد کی جائے گی، جبکہ اراکینِ سینیٹ کو ایپ کے استعمال سے مکمل طور پر روشناس کرانے کے لیے ایک خصوصی تربیتی اور آگاہی سیشن بھی ترتیب دیا جائے گا تاکہ ملک میں جدید طرزِ حکمرانی کے فروغ کے لیے جدت اور ٹیکنالوجی کا یہ سفر کامیابی سے آگے بڑھ سکے.
