بھارت کی جنوبی ریاست تمل ناڈو میں ایک نجی سی فوڈ پروسیسنگ یونٹ میں امونیا گیس لیک ہونے سے 7 مزدور ہلاک اور 70 سے زیادہ افراد اسپتال منتقل ہو گئے۔
حکام کے مطابق یہ واقعہ ایک سی فوڈ فیکٹری میں امونیا گیس لیک ہونے کے باعث پیش آیا۔
تمل ناڈو کے وزیراعلیٰ کی جانب سے ایکس پر جاری بیان میں واقعے کی تصدیق کی گئی۔
بھارتی سرکاری نشریاتی ادارے آل انڈیا ریڈیو کے مطابق حادثے میں 7 فیکٹری ورکرز ہلاک ہوئے، جبکہ 70 سے زیادہ افراد کو اسپتال میں داخل کرایا گیا۔
بھارت کی نیشنل ڈیزاسٹر رسپانس فورس نے خصوصی کیمیکل، بائیولوجیکل اور نیوکلیئر رسپانس ٹیموں کے ساتھ فوری ریسکیو آپریشن شروع کیا۔
حکام کے مطابق ٹیموں نے سخت حفاظتی اقدامات کے تحت گیس لیکیج کو روکنے کے لیے کارروائی کی۔
پولیس، ڈیزاسٹر مینجمنٹ، فائر اینڈ ایمرجنسی سروسز اور محکمہ صحت کے اہلکار بھی فوری طور پر جائے وقوعہ پر پہنچے اور امدادی کارروائیوں میں حصہ لیا۔
بھارتی وزیراعظم نریندر مودی نے واقعے پر گہرے دکھ کا اظہار کیا۔
وزیراعظم آفس کی جانب سے جاری بیان میں کہا گیا کہ وزیراعظم نے حادثے میں جان سے جانے والوں کے اہل خانہ سے دلی تعزیت کا اظہار کیا ہے۔
حکام کے مطابق 30 رکنی ٹیم کو گیس ڈیٹیکشن ڈیوائسز اور دیگر خصوصی ریسکیو آلات کے ساتھ تعینات کیا گیا ہے، جو لیکیج کو روکنے کے لیے کام کر رہی ہے۔
