امریکی ریاست کیلیفورنیا کے سان ڈیاگو چڑیا گھر میں ایک نایاب اور انتہائی منفرد پرندے ‘واٹ لیڈ جاکانا’ کے بچے کی پیدائش ہوئی ہے، جو اپنی طویل انگلیوں کی وجہ سے مشہور ہے۔ چڑیا گھر کی انتظامیہ کے مطابق گزشتہ 20 سالوں کے دوران ان کے ہاں اس نسل کے کسی بچے کی پیدائش کا یہ پہلا موقع ہے۔
یہ بھی پڑھیں: مدینہ ریجن میں پرندوں کی نایاب اقسام ماحولیاتی سیاحت کے فروغ کی نئی راہیں
یہ پرندہ اپنی غیر معمولی لمبی انگلیوں اور پنجوں کی بدولت پانی پر تیرتے پتوں اور نباتات پر آسانی سے چلنے کی صلاحیت رکھتا ہے، جس کی وجہ سے اسے ‘لیلی پیڈ برڈ’ بھی کہا جاتا ہے۔ چڑیا گھر کے ماہرین نے بتایا کہ اس بچے کی دیکھ بھال اور پرورش انتہائی احتیاط کے ساتھ کی جارہی ہے۔
واٹ لیڈ جاکانا نامی پرندوں کی یہ نسل بنیادی طور پر جنوبی امریکا کے دلدلی اور مرطوب علاقوں میں پائی جاتی ہے۔ ماہرین کے مطابق ان پرندوں میں گھونسلا بنانے اور بچوں کی پرورش کی تمام تر ذمہ داری مادہ کے بجائے نر پرندہ اکیلا ہی سنبھالتا ہے۔
یہ بھی پڑھیں: دنیا کے صرف ایک دریا میں پائی جانے والی قدیم و نایاب مچھلی معدومیت کے خطرے سے دوچار
انتظامیہ کے مطابق مادہ کے انڈے دینے کے بعد نر پرندہ اکیلا ہی ان پر بیٹھتا ہے اور بچے نکلنے تک یہ ڈیوٹی سنبھالتا ہے۔ بچے پیدا ہونے کے بعد پہلے 40 سے 70 دنوں تک باپ ہی ان کا خیال رکھتا ہے، انھیں خطرات سے بچانے کے لیے پروں میں چھپاتا ہے اور خوراک کی تلاش سکھاتا ہے۔
چڑیا گھر انتظامیہ کا کہنا ہے کہ اس نایاب بچے کی پیدائش ان کے تحفظِ حیات کے پروگرام کے لیے ایک بڑی کامیابی ہے۔ فی الحال اس بچے کو عام عوام کے سامنے نہیں لایا گیا تاکہ وہ محفوظ ماحول میں اپنی نشوونما مکمل کر سکے۔
