پاکستان کرکٹ بورڈ کی سلیکشن کمیٹی اور ٹیم مینجمنٹ نے دورہ ویسٹ انڈیز اور انگلینڈ کے لیے قومی ٹیسٹ اسکواڈ کے 5 رکنی فاسٹ بولنگ اٹیک کو حتمی شکل دے دی ہے۔
غیر ملکی کنڈیشنز کو مدنظر رکھتے ہوئے تیار کیے گئے اس پیس اٹیک میں جہاں نوجوان خون کو شامل کیا گیا ہے، وہیں تجربہ کار بولرز کی بھی واپسی ہوئی ہے۔ تاہم سب سے بڑی حیرت انگیز پیش رفت اسٹار فاسٹ بولر شاہین شاہ آفریدی کی اسکواڈ سے عدم شمولیت ہے۔
نوجوان عبید شاہ کی پہلی بار قومی اسکواڈ میں شمولیت
میڈیا رپورٹ کے مطابق قومی ٹیم کے مایہ ناز فاسٹ بولر نسیم شاہ کے 20 سالہ چھوٹے بھائی عبید شاہ پہلی مرتبہ پاکستان کے سینیئر ٹیسٹ اسکواڈ کا حصہ بنیں گے۔
یہ بھی پڑھیں:پاکستان نے آسٹریلیا کو تیسرے ون ڈے میں 4وکٹوں سے شکست دے کر سیریز اپنے نام کرلی
عبید شاہ کو فرسٹ کلاس کرکٹ میں مسلسل شاندار اور جاندار کارکردگی کا مظاہرہ کرنے پر قومی ٹیم کی نمائندگی کا صلہ ملا ہے اور وہ ان اہم ترین غیر ملکی دوروں میں توجہ کا مرکز ہوں گے۔
عامر جمال اور محمد عباس کی ٹیسٹ ٹیم میں واپسی
سلیکشن کمیٹی نے فاسٹ بولنگ آل راؤنڈر عامر جمال کی تقریباً ڈیڑھ سال کے طویل عرصے بعد قومی ٹیسٹ ٹیم میں واپسی کا فیصلہ کیا ہے، جن سے بیٹنگ اور بولنگ دونوں شعبوں میں کلیدی کردار کی توقع کی جا رہی ہے۔
اس کے ساتھ ہی فرسٹ کلاس اور ٹیسٹ کرکٹ کا وسیع تجربہ رکھنے والے محمد عباس کو بھی اسکواڈ کا حصہ بنایا گیا ہے۔
محمد عباس کے پاس ٹیسٹ کرکٹ میں 110 وکٹوں کا بھاری تجربہ ہے، جو انگلینڈ اور ویسٹ انڈیز کی پچوں پر پاکستان کے لیے انتہائی سود مند ثابت ہو سکتا ہے۔
محمد علی اور خرم شہزاد پر اعتماد بحال
رپورٹس کے مطابق فاسٹ بولر محمد علی بھی قومی ٹیسٹ ٹیم میں جگہ بنانے میں کامیاب ہو گئے ہیں، جنہوں نے اپنا آخری ٹیسٹ ستمبر 2024 میں بنگلہ دیش کے خلاف کھیلا تھا۔
مزید پڑھیں:آئی سی سی رینکنگ: ٹی 20 کی ٹاپ 20 فہرست سے پاکستانی بولرز غائب
دوسری جانب خرم شہزاد حالیہ مقابلوں میں اپنی مسلسل عمدہ اور نپی تلی بولنگ کی بدولت ایک بار پھر سلیکٹرز کا اعتماد حاصل کرنے میں کامیاب رہے ہیں اور وہ 5 رکنی پیس اٹیک کا اہم حصہ ہوں گے۔
شاہین آفریدی سمیت سینیئرز کو آرام دینے کا فیصلہ
دورے کے حوالے سے سب سے اہم فیصلہ سینیئرز کو ڈراپ یا آرام دینے کا ہے۔ میڈیا رپورٹ کے مطابق اسٹار فاسٹ بولر شاہین شاہ آفریدی، حسن علی اور حماد بٹ کو ان دونوں اہم دوروں کے لیے ٹیسٹ اسکواڈ میں شامل نہیں کیا جائے گا اور ان کی جگہ مکمل فٹ اور ان فارم بولرز کو ترجیح دی گئی ہے۔
کنڈیشنز کے مطابق باؤلنگ اٹیک کی تشکیل
رپورٹ کے مطابق ٹیم مینجمنٹ اور سلیکشن کمیٹی کا ماننا ہے کہ ویسٹ انڈیز اور انگلینڈ کی کنڈیشنز تیز گیند بازوں کے لیے سازگار ہوتی ہیں، اسی لیے ان پچوں کی ضرورت اور موسم کو مدنظر رکھتے ہوئے اس مضبوط 5 رکنی پیس اٹیک کو حتمی شکل دی گئی ہے، جو دونوں اہم غیر ملکی ٹیسٹ دوروں میں پاکستان کی لاج رکھنے کے لیے میدان میں اترے گا۔
