پسیئر پینانگ میں 2024 کے دوران ایک خاتون اور اسٹرولر سے ٹکرانے کے واقعے میں سابق ایئر فورس چیف کو عدالت نے مجرم قرار دیتے ہوئے 5 ہزار سنگاپور ڈالر جرمانہ اور 5 سال کے لیے ڈرائیونگ سے نااہلی کی سزا سنادی ہے۔
74 سالہ گو یونگ سیانگ نے 1 جولائی کو عدالت میں اعترافِ جرم کیا کہ وہ گاڑی چلاتے ہوئے مناسب احتیاط نہ برتنے کے باعث ایک 44 سالہ انڈونیشی گھریلو ملازمہ کو زخمی کرنے کا سبب بنے، جو اس وقت اسٹرولر دھکیل رہی تھی۔
عدالتی کارروائی کے دوران ان کی گاڑی کے اندر نصب کیمرا کی فوٹیج بھی پیش کی گئی، جس میں دیکھا جا سکتا ہے کہ ٹکر کے بعد خاتون ہوا میں اچھل کر زمین پر گرتی ہیں۔
استغاثہ کے مطابق ایک اضافی الزام، جس میں اسٹرولر میں موجود 2 سالہ بچے کو نقصان پہنچانے کا معاملہ بھی شامل تھا، سزا کے وقت زیرِ غور لایا گیا۔
حادثے کے نتیجے میں خاتون کے چہرے پر شدید زخم آئے، چہرہ خون آلود ہو گیا جبکہ گاڑی کا فرنٹ شیشہ بھی ٹوٹ گیا اور خراشیں آئیں۔
متاثرہ خاتون اور بچے کو نیشنل یونیورسٹی اسپتال منتقل کیا گیا، جہاں خاتون کو چہرے پر گہرے زخم، لیگامینٹ پھٹنے اور گھٹنے کی چوٹ سمیت متعدد زخموں کے باعث 42 دن کی میڈیکل چھٹی دی گئی۔
بچے کے والدین نے اس کے لیے کسی اضافی طبی چھٹی کی ضرورت سے انکار کر دیا۔
استغاثہ نے عدالت سے 4 ہزار سے 5 ہزار ڈالر کے درمیان جرمانے کی سفارش کی تھی، مؤقف اختیار کیا گیا کہ اگرچہ خاتون کو سنگین چوٹیں آئی ہیں، تاہم مستقل معذوری کا امکان نہیں ہے۔
