بنگلہ دیش میں ارجنٹینا کی فٹبال ٹیم کے لیے غیرمعمولی محبت ایک بار پھر عالمی توجہ کا مرکز بن گئی، جہاں فیفا ورلڈکپ 2026 میں الجزائر کے خلاف ارجنٹینا کے افتتاحی میچ میں لیونل میسی کی ہیٹ ٹرک کے بعد ہزاروں شائقین سڑکوں پر نکل آئے اور جشن منایا۔
مزید پڑھیں:لیونل میسی کا نیا ریکارڈ : فیفا ورلڈ کپ میں سب سے زیادہ گول کرنے والے فٹبالر بن گئے
رپورٹ کے مطابق بنگلہ دیش نے کبھی فیفا ورلڈکپ کے لیے کوالیفائی نہیں کیا، تاہم ہر ورلڈ کپ میں ارجنٹینا کے میچوں کے دوران ملک بھر میں بڑی اسکرینیں نصب کی جاتی ہیں، گھروں اور محلوں میں اجتماعی طور پر میچ دیکھے جاتے ہیں اور آسمانی نیلے اور سفید رنگ کے جھنڈے ہر طرف دکھائی دیتے ہیں۔
بہت سے بنگلہ دیشی شائقین کا کہنا ہے کہ ان کی ارجنٹینا سے محبت کا آغاز 1986 کے ورلڈ کپ میں ڈیگو میراڈونا کی شاندار کارکردگی سے ہوا، جبکہ نئی نسل لیونل میسی کو اپنا ہیرو مانتی ہے۔ 2022 میں ارجنٹینا کی عالمی فتح نے اس تعلق کو مزید مضبوط کر دیا۔
بنگلہ دیش میں ارجنٹینا کی مقبولیت نے دونوں ممالک کے سفارتی تعلقات کو بھی تقویت دی۔ 2022 کے ورلڈکپ کے دوران بنگلہ دیشی شائقین کی غیرمعمولی حمایت کے بعد ارجنٹینا نے 2023 میں 45 برس بعد ڈھاکا میں اپنا سفارتخانہ دوبارہ کھول دیا، جبکہ دونوں ممالک کے حکام نے فٹبال کو عوامی روابط بڑھانے کا اہم ذریعہ قرار دیا۔
مزید پڑھیں:ارجنٹائن کے عالمی کپ فاتح لیونل میسی کے 900 گول، فٹ بال کی نئی تاریخ رقم
بنگلہ دیش میں فٹبال کا بے پناہ جنون موجود ہے، تاہم کھیل کے بنیادی ڈھانچے، اکیڈمیوں اور تربیتی نظام کی کمی کے باعث یہ جذبہ قومی ٹیم کی کامیابیوں میں تبدیل نہیں ہو سکا، حالانکہ عوام اب بھی ایک مضبوط فٹبال نظام اور روشن مستقبل کی امید رکھتے ہیں۔
